Qindra fëmijë me një formë të rrallë dhe të rëndë të epilepsisë po shpresojnë që një ilaç i ri që po shpërndahet në NHS mund të sigurojë një cilësi më të mirë jete.
Fenfluramina është rekomanduar nga Instituti Kombëtar për Ekselencën e Shëndetit dhe Kujdesit (NICE) për pacientët e moshës dy vjeç e lart me sindromën Lennox-Gastaut (LGS).
Bëhet e ditur se LGS është një formë e rrallë dhe e rëndë e epilepsisë që fillon në fëmijërinë e hershme dhe është rezistente ndaj shumë trajtimeve.
Mendohet se 1-2% e 60,000 fëmijëve me epilepsi në Angli kanë LGS, shkruan skynews, përcjell Telegrafi.
Fenfluramine është trajtimi i parë jo i bazuar në kanabis i miratuar për LGS, sipas zyrtarëve të NHS.
Ilaçi merret si një ilaç i lëngshëm oral çdo ditë dhe funksionon duke rritur nivelet e serotoninës në tru për të reduktuar krizat.
Raportohet se më parë, i vetmi trajtim i rekomanduar nga NICE për LGS ishte kanabidioli Epidyolex me medikamentin clobazam, i cili u miratua në vitin 2019.
Profesor Stephen Powis, drejtor kombëtar mjekësor në NHS Angli tha se rekomandimi i fundit u ofron pacientëve dhe familjeve të tyre “shpresë të re”.
“Për fëmijët dhe familjet që jetojnë me sindromën Lennox-Gastaut, çdo ditë mund të jetë sfiduese dhe ky opsion i ri trajtimi në NHS tani do të ofrojë shpresë të re, duke u dhënë shumë njerëzve mundësinë për një stabilitet më të madh dhe një cilësi më të mirë jete”, tha Powis.
