Panairi i sivjetëm i arsimit do të mbahet sot dhe nesër në Skopje siti moll dhe do të paraqesë një mundësi unike për maturantët dhe studentët që të mësojnë për mundësitë e tyre akademike dhe karriere.
Ngjarja organizohet nga Skopje Siti Moll dhe “Studentaria” – platforma dhe komuniteti më i madh studentor digjital në Maqedoni, nd;rsa mbështetet nga banka Shparkase.
Në hapjen zyrtare të Panairit do të marrin pjesë ministrja e Arsimit Vesna Janevska dhe themeluesi i Studentaria dhe organizatori i Panairit, Goshe Nikolov.
Në Panair do të marrin pjesë universitete shtetërore dhe private me mbi 90 fakultete, akademi për aftësi dhe shitje digjitale, si dhe kompani dhe organizata rinore. Pjesëmarrësit përmes prezantimeve, punëtorive interaktive, diskutimeve në panel dhe shfaqjeve eksperimentale. do të sjellin mundësitë më të fundit arsimore dhe profesionale më pranë të rinjve.
Vizitorët do të mund të marrin informacione për bursat, programet akademike, afatet e regjistrimit, përfitimet e studentëve, si dhe këshilla për ndërtimin e një karriere të suksesshme.
Skopje Siti Moll dhe “Studentaria” ofrojnë programin e ngjarjes, i cili përfshin: prezantime nga universitetet dhe akademitë, këshillim për karrierë, punëtori për shëndetin mendor me psikolog, prezantim të mundësive për bursa dhe programe Erasmus+, panel diskutime me ekspertë për tema akademike dhe karriere, rrjetëzim me përfaqësues nga sektori i arsimit dhe biznesit.
“Panairi është një mundësi unike për nxënësit e shkollave të mesme dhe studentët e ardhshëm në një vend të takohen me përfaqësues të mbi 80 fakulteteve nga Maqedonia, të mësojnë për programet e tyre të studimit, afatet e regjistrimit, bursat dhe mundësitë për karrierë, jetën e kampusit, por edhe për të marrë pjesë në punëtoritë e këshillimit të karrierës dhe për t’i hulumtuar rrugët e ndryshme arsimore dhe profesionale që do të përcaktojnë të ardhmen e tyre”, njoftoi organizatori.
Ngjarja ka për qëllim t’u sigurojë maturantëve informacionet dhe burimet e nevojshme për të marrë vendime të informuara për arsimimin dhe karrierën e tyre të ardhshme, ndërsa studentët aktualë do të kenë mundësinë të eksplorojnë praktikat, trajnimet shtesë dhe zhvillimin profesional, duke u lidhur drejtpërdrejt me universitete, kompani dhe ekspertë nga fusha të ndryshme.
Pjesë e panairit do të jetë edhe Këndi i prindërve, i cili synon t’u ofrojë prindërve dhe kujdestarëve informacione, strategji dhe mbështetje të rëndësishme se si t’i ndihmojnë fëmijët e tyre të kalojnë këtë fazë vendimtare të jetës së tyre.
