Partnerët më të mëdhenj tregtarë të Amerikës premtuan hakmarrje për njoftimin masiv të tarifave të presidentit Donald Trump dhe përgjigjja e parë e madhe ka ardhur nga Kanadaja.
Kryeministri Mark Carney tha se Kanadaja do të vendosë një kundërtarifë 25% për automjetet e importuara nga SHBA që nuk janë në përputhje me Marrëveshjen Shtetet e Bashkuara-Meksikë-Kanada (USMCA) në përgjigje të tarifave amerikane për automjetet kanadeze dhe pjesët e automjeteve që hynë në fuqi sot, raporton KosovaPress.
“Siç i thashë presidentit Trump gjatë telefonatës sonë javën e kaluar, Kanadaja do t’i përgjigjet tarifave të automjeteve të SHBA-së dhe sot, unë po njoftoj se Qeveria e Kanadasë do të përgjigjet duke përputhur qasjen e SHBA me tarifat 25% për të gjitha automjetet e importuara nga Shtetet e Bashkuara që nuk janë në përputhje me Marrëveshjen tonë të Tregtisë së Lirë të Amerikës së Veriut”, tha Carney.
Kryeministri kanadez tha se nuk kishte bisedime të planifikuara mes tij dhe Trump, por ai do të fliste sërish me presidentin amerikan “nëse është e përshtatshme”. Carney tha gjithashtu se kundër-tarifat e Kanadasë nuk do të ndikojnë në pjesët e veturave.
Megjithëse Carney tha se Kanadaja ende e konsideron SHBA-në një aleat në mbrojtje dhe siguri, vendi i tij “duhet të kërkojë diku tjetër për të zgjeruar tregtinë tonë, për të ndërtuar ekonominë tonë dhe për të mbrojtur sovranitetin tonë”.
“Sistemi i tregtisë globale i ankoruar në Shtetet e Bashkuara, në të cilin Kanadaja është mbështetur që nga fundi i Luftës së Dytë Botërore, një sistem që, megjithëse jo i përsosur, ka ndihmuar në ofrimin e prosperitetit për vendin tonë për dekada të tëra, ka mbaruar,” tha Carney.
Carney shtoi se përgjigja kanadeze “nuk do të ndikojë në përmbajtjen e automjeteve nga Meksika”, për të cilën kryeministri tha se po respekton marrëveshjet e tregtisë së lirë në fuqi.
“Ne i marrim këto masa me ngurrim dhe i marrim në mënyra që synohet dhe do të shkaktojë ndikim maksimal në Shtetet e Bashkuara dhe ndikim minimal këtu në Kanada,” tha Carney, duke shtuar se tarifat e tjera hakmarrëse të Kanadasë do të mbeten në fuqi.
