Drejtuesja politike e Partisë Socialiste në qarkun e Tiranës, Elisa Spiropali deklaroi sot se “PS ka fituar thellë në bashkinë e Vorës”.
Në një prononcim për shtyp nga Vora, ku ka përfunduar numërimi elektronik, Spiropali tha se “edhe pse rezultati i numërimit elektronik duhet të kishte dalë që mbrëmë, ne investuam në numërimin elektronik për Vorën dhe njësinë 10 për të dalë rezultati, për të vazhduar traditën e pasqyrimit të rezultateve në kohë reale, ku bashkia Vorë do të kishte qenë bashkia e parë që do të shpallte fitoren e thellë për PS-në siç edhe rezulton nga ky numërim sot”.
“PS ka fituar në Vorë ashtu siç pritej me një diferencë të thellë për shkak të punëve të mira që kemi bërë këtu, jo vetëm rindërtimit, por edhe projektet e tjera të zhvillimit të Vorës, infrastrukturës. Gjatë punës së madhe në terren të PS-së, e cila është shumë pranë qytetarëve çdo ditë të vitit jo vetëm në muajin e zgjedhjeve dhe ky rezultat reflekton këtë besim të madh që Vora, qarku i Tiranës dhe gjithë Shqipëria i ka dhënë Edi Ramës dhe PS-së”, nënvizoi Spiropali.
Spiropali bëri të ditur se “ne sapo e morëm rezultatin tonë, i cili u përcoll tek KQZ dhe i takon KQZ-së të shpallë zyrtarisht rezultatin për shkak të asaj që quhej numërim elektronik, por që nuk përfundoi në një numërim elektronik”.
“Kemi diferencë shumë të thellë edhe pse kanë votuar më pak në bashkinë e Vorës PS ka një rritje në përqindje nga 2021″, tha Spiropali.
Më tej Spiropali tha se ne e kemi shpallur objektivin ton 20 mandate në qarkun e Tiranës uroj që ky vullnet i shprehur i qytetarëve të lexohet në kutitë e numërimit për PS-në, për Shqipërinë 2030 në BE”.
