Shkuç, 23 maj – Me ftesë të kryetarit të Senatit të Universitetit të Tetovës, Prof. Dr. Kenan Ferati, këtë institucion të arsimit të lartë do ta vizitojë një nga figurat më të shquara të shkencës bashkëkohore – nobelistja dhe shkencëtarja me famë botërore, Prof. Dr. Elizabeth Blackburn.
Siç njofton UT-ja, ky zhvillim i rëndësishëm vjen pas pjesëmarrjes së përfaqësuesve të Universitetit të Tetovës në Konferencën Vjetore të Aleancës Aurora, e cila u mbajt së fundmi në Paris, prej 19-22 maj 2025.
Gjatë konferencës, udhëheqësit e UT-së realizuan disa takime me karakter pune, me qëllim forcimin e bashkëpunimeve ndërkombëtare akademike dhe shkencore. Ndër takimet më domethënëse ishte ai i kryetarit të Senatit, Prof. Dr. Kenan Ferati, me Prof. Dr. Elizabeth Blackburn, biokimiste dhe biologe me ndikim të jashtëzakonshëm në shkencat shoqërore.
“Në këtë takim, Prof. Dr. Blackburn e pranoi me kënaqësi ftesën e Prof. Dr. Kenan Feratit, për ta vizituar Universitetin e Tetovës. Ajo do të mbajë një ligjëratë të posaçme për studentët, studiuesit dhe komunitetin akademik, ku do të ndajë përvojat e saj kërkimore, arritjet shkencore dhe vizionin e saj për të ardhmen e shkencës së mjekësisë dhe biologjisë molekulare. Vizita e Blackburn do të shënojë një ngjarje historike për Universitetin e Tetovës, duke e vendosur këtë institucion në vëmendjen e skenës ndërkombëtare akademike dhe shkencore. Takimi i studentëve dhe stafit akademik me një shkencëtare të kalibrit të saj është një mundësi unike për t’i frymëzuar brezat e rinj dhe për të inkurajuar përkushtimin ndaj hulumtimit shkencor”, theksohet në kumtesë.
Universiteti i Tetovës e konsideron këtë vizitë si një motivim të fuqishëm për të vijuar rrugën drejt zhvillimit akademik, bashkëpunimit ndërkombëtar dhe promovimit të shkencës në shoqëri.
