Asociacioni i Gazetarëve të Kosovës (AGK), ka shprehur shqetësim të thellë lidhur me gjendjen financiare të Transmetuesit Publik të Kosovës (RTK), duke theksuar se paralajmërimet për ndërprerjen e financimit janë një zhvillim serioz dhe alarmues për funksionimin e medias publike në vend.
“Paralajmërimi se brenda pak ditësh, RTK do të mbetet pa financim dhe nuk do të jetë në gjendje të paguajë të punësuarit e saj për muajin korrik, është alarmues,” thuhet në reagimin e AGK-së.
Sipas këtij asociacioni, RTK ka një rol thelbësor në peizazhin mediatik të Kosovës dhe duhet të mbrohet nga çdo formë presioni politik apo financiar që rrezikon pavarësinë editoriale dhe funksionimin normal të saj.
“Gazetarët, kameramanët dhe stafi tjetër i RTK-së duhet të jenë në gjendje që të bëjnë punën e tyre në mënyrë të papenguar nga presione politike apo financiare,” thekson më tej AGK-ja.
Duke marrë parasysh situatën aktuale të bllokimit institucional dhe mungesën e një Kuvendi funksional, AGK-ja i ka bërë thirrje drejtpërdrejt Qeverisë së Kosovës që të marrë masa të menjëhershme për të garantuar vazhdimësinë financiare të transmetuesit publik.
“AGK-ja e njeh rolin e rëndësishëm që luan Transmetuesi Publik në skenën mediale të Kosovës, dhe në mungesë të Kuvendit funksional i bën thirrje Qeverisë së Kosovës që të ndërmarrë hapat e nevojshëm për vazhdimin e financimit të RTK-së”, thuhet tutje në reagim.
