Shkup, 14 maj Zhurnal.mk – Sektori për Krim Kompjuterik pranë Byrosë për Siguri Publike dhe Njësia për Siguri Kibernetike pranë Departamentit për Informatikë dhe Telekomunikacion në kuadër të Ministrisë së Punëve të Brendshme informojnë opinionin se ditëve të fundit është vërejtur një dukuri e shpeshtë, ku persona të panjohur përmes numrit të huaj telefonik +639606963624 u dërgojnë qytetarëve në Maqedoni mesazhe për kinse kundërvajtje të regjistruar në trafik dhe kërkojnë pagesë me kartelë bankare përmes një ueb-faqeje të rreme: http://mvr.govmk.cam/mk
Mashtrimi realizohet në atë mënyrë që, pasi qytetarët klikojnë në linkun e dërguar në mesazh, ai i dërgon në një faqe të rreme të MPB-së ku kërkohet të shkruajnë targat e automjetit të tyre, e më pas hapet një dritare tjetër ku paraqitet kinse një kundërvajtje dhe kërkohet pagesë prej 1.500 denarësh.
“Apelojmë deri te qytetarët të jenë të kujdesshëm dhe të mos u besojnë mesazheve që vijnë nga ueb-faqe jo legjitime të Ministrisë, si dhe të mos lënë të dhëna personale apo të dhëna të kartelave të pagesës, të cilat më pas mund të keqpërdoren.
Gjithashtu, Sektori për Krim Kompjuterik pranë MPB-së apelon që qytetarët dhe personat juridikë të mos hapin linke të dyshimta dhe dokumente të bashkëngjitura në mesazhe që nuk vijnë nga dërgues të verifikuar dhe të njohur, me qëllim që të mos bien pre e mashtrimeve të këtij lloji”, thonë nga MPB.
Për ta njohur më lehtë mesazhin e vërtetë, qytetarët duhet të dinë se te pjesa e dërguesit duhet të shkruajë MVR-SC.
