Uashington, 10 gusht, Zhurnal.mk – Dy avionë luftarakë amerikanë F-16 u ngritën për të interceptuar dy avionë civilë që kishin hyrë në një zonë të përkohshme ndalim-fluturimi pranë klubit privat të golfit të presidentit amerikan, Donald Trump në Bedminster, New Jersey.
Komanda e Mbrojtjes Hapësinore të Amerikës së Veriut (NORAD) konfirmoi se avionët luftarakë u ngritën në ajër për të identifikuar dhe shoqëruar avionët civilë jashtë zonës së kufizuar të fluturimit.
Sipas raportimeve të mediave amerikane, përfshirë Fox News dhe New York Post, incidenti ndodhi në një distancë të shkurtër nga klubi i golfit i Trump, ku presidenti po qëndronte gjatë fundjavës.
NORAD nuk dha detaje të mëtejshme mbi numrin e saktë të avionëve luftarakë të angazhuar në operacion dhe as mbi identitetin apo llojin e avionëve civilë që shkelën zonën e ndalim-fluturimit.
Vendosja e zonave të përkohshme të kufizimit të fluturimeve është një masë e zakonshme sigurie gjatë qëndrimit të presidentit amerikan në një zonë të caktuar.
Shkelje të tilla ndodhin herë pas here, veçanërisht nga avionë të vegjël civilë, pilotët e të cilëve mund të mos jenë në dijeni të kufizimeve.
Pas incidentit, NORAD u rikujtoi pilotëve rëndësinë e kontrollimit të rregullt të NOTAM-ve (Njoftime për Pilotët), të cilat përmbajnë informacion mbi kufizimet dhe ndryshimet e përkohshme në hapësirën ajrore.
