Nju Delhi, 15 maj Zhurnal.mk – Teherani “nuk ka besim” te Shtetet e Bashkuara të Amerikës dhe është i interesuar për negociata me Uashingtonin vetëm nëse pala amerikane tregohet serioze, deklaroi sot ministri i Jashtëm iranian, Abbas Araghchi, ndërsa bisedimet për përfundimin e luftës mbeten të pezulluara, sipas Reuters.
Gjatë një vizite në Nju Delhi për takimin e ministrave të Jashtëm të BRICS-it, Araghchi tha se Irani po përpiqet të ruajë armëpushimin për t’i dhënë një shans diplomacisë, por paralajmëroi se vendi është gjithashtu i gatshëm të rikthehet në luftime nëse është e nevojshme.
Ai deklaroi se të gjitha anijet mund të kalojnë përmes Ngushticës së Hormuzit, me përjashtim të atyre vendeve që janë në luftë me Teheranin, duke shtuar se anijet që duan të kalojnë tranzito duhet të koordinohen me marinën iraniane.
Sipas Araghchit, situata rreth kësaj rruge strategjike detare mbetet “shumë e ndërlikuar”.
Irani ka mbyllur praktikisht ngushticën për pjesën më të madhe të trafikut detar pasi lufta me SHBA-në dhe Izraelin shpërtheu në shkurt. Më parë, kjo rrugë përballonte rreth një të pestën e furnizimit botëror me naftë dhe gaz.
Uashingtoni dhe Teherani njoftuan muajin e kaluar një armëpushim, por ende nuk kanë arritur një marrëveshje të përhershme paqeje. Bisedimet, të ndërmjetësuara nga Pakistan, janë pezulluar pasi të dyja palët hodhën poshtë propozimet më të fundit të njëra-tjetrës javën e kaluar.
“Mesazhet kontradiktore” kanë krijuar hezitim mbi synimet reale të amerikanëve për negociatat, tha Araghchi, duke shtuar se procesi i ndërmjetësimit nga Pakistani nuk ka dështuar, por ndodhet në “vështirësi”.
Deklaratat e tij erdhën vetëm pak orë pasi presidenti amerikan Donald Trump tha se durimi i tij ndaj Iranit po shteron dhe se kishte rënë dakord me presidentin kinez Xi Jinping që Teherani duhet të rihapë Ngushticën e Hormuzit.
