Më 26 shkurt 2026, rreth orës 12:00, efektivët e Sektorit për Punë të Brendshme në Strumicë kanë arrestuar shtetasen J.T. (53 vjeçe), nën dyshimin e bazuar për kryerjen e veprës penale “Fajde”. Sipas informacioneve zyrtare, e dyshuara i kishte dhënë një banori të një fshati të Strumicës shumën prej 2.700 eurosh në qershor të vitit 2025, por në këmbim kërkonte t’i kthehej shuma joproporcionale prej 15.000 eurosh.
Operacioni i arrestimit u krye në flagrancë në momentin kur viktima po i dorëzonte të dyshuarës një kartëmonedhë prej 100 eurosh, e cila ishte paraprakisht e shënuar nga policia si pjesë e kamatës mujore. Gjatë kontrollit fizik dhe kontrollit të mëvonshëm në banesën e saj me urdhër gjykate, policia gjeti dhe sekuestroi kartëmonedhën e shënuar, shuma parash në denarë dhe euro, akte noteriale, si dhe fletore e dokumente ku ajo mbante shënime të hollësishme për personat e tjerë që u kishte dhënë para me fajde.
Aktualisht, J.T. ndodhet e ndaluar në stacionin policor dhe ndaj saj do të ngrihet padi penale sipas nenit 260 të Kodit Penal, pasi të përfundojë dokumentimi i plotë i rastit nga Prokuroria Publike e Strumicës.
