Zv/kryeministrja dhe ministrja e Infrastrukturës, Belinda Balluku inspektoi këtë të premte tunelin e Llogarasë, një nga veprat infrastrukturore më të rëndësishme në jug të vendit.
Balluku dha lajmin se duke filluar nga dita e nesërme, 24 maj, tuneli do të hapet për qarkullimin e automjeteve.
“Duke nisur nga nesër, 24 maj, hapet për qarkullimin e automjeteve tuneli i Llogarasë. Vepra që shkurton distancën drejt bregdetit të jugut dhe që i shërben sezonit turistik. Pa pagesë deri më 15 shtator. Ndalohet kalimi vetëm për mjetet e tonazhit të rëndë”, u shpreh Balluku.
I hapur për automjetet në ditët e para të korrikut të kaluar për të çliruar trafikun drejt bregdetit të jugut, tuneli i Llogarasë u mbyll në muajin shtator dhe gjatë kësaj periudhë në të janë kryer punimet e fundit teknike duke e rikthyer plotësisht funksional për turistët dhe vizitorët që preferojnë rivierën.
