Kreu i grupit parlamentar të Partisë Demokratike, Gazment Bardhi, ka kërkuar shkarkimin e ministrit të Brendshëm, duke e akuzuar atë për keqinformim të opinionit publik dhe neglizhencë të strukturave policore në mbrojtjen e institucioneve të drejtësisë.
Bardhi ngriti këtë kërkesë në Kuvend, duke deklaruar se Policia e Shtetit nuk iu përgjigj thirrjes së Gardës së Republikës për të marrë masa shtesë sigurie para godinave të SPAK dhe GJKKO, ku ishin mbledhur mbështetës të kryebashkiakut të Tiranës, Erion Veliaj.
“Në emër të grupit parlamentar të PD-së, kërkoj që të thirret në seancë ministri i Brendshëm, i cili keqinformoi opinionin publik dhe Kuvendin e Shqipërisë duke pretenduar se policia nuk kishte dijeni për turmën e punonjësve të Bashkisë para GJKKO-së gjatë seancës për masën ndaj Veliajt,” – deklaroi Bardhi.
“Qoftë GJKKO, qoftë SPAK, kanë konfirmuar zyrtarisht se, përmes Gardës, kishin njoftuar për cenimin e sigurisë së ambienteve të tyre drejtuesit më të lartë të Policisë së Shtetit. Megjithatë, në një veprim të paprecedentë, policia jo vetëm që nuk ndërhyri, por refuzoi hapur t’i përgjigjej thirrjes së Gardës”, – tha Bardhi.
Ai e cilësoi këtë situatë si një sulm të qeverisë ndaj sistemit gjyqësor.
“Po flasim për një grusht shteti të pushtetit ekzekutiv ndaj pushtetit gjyqësor. Mesazhi që po u dërgohet gjyqtarëve dhe prokurorëve është i qartë: nëse merrni vendime pa lejen e Edi Ramës, ju lihen pa mbrojtje dhe kërcënoheni.”
Gjithashtu, Bardhi akuzoi policinë për një qëndrim të pasaktë mbi situatën.
Në përfundim, ai kërkoi që ministri i Brendshëm të dalë në seancë për të dhënë shpjegime dhe të mbajë përgjegjësi për, siç e cilësoi ai, mashtrimin e publikut dhe institucioneve.
