Shkup, 27 tetor, argument.mk/ – Gjatë një kontrolli në Kavadar, u gjetën një pushkë gjuetie, pajisje gjuetie të paligjshme dhe mish gjahu, ndërsa u arrestua një person, kumtuan sot nga Ministria e Punëve të Brendshme.
“Dje rreth orës 15, nëpunës policorë të Stacionit Policor për Mbikëqyrje Kufitare Mihajllovë, pranë Qendrës Rajonale për Çështje Kufitare – Jug, të Repartit për Krim Ndërkufitar, Migracion, të Huaj dhe Riatdhesim pranë qendrës së njëjtë rajonale, si dhe të NJPB Kavadar, e kanë privuar nga liria J.P. (69) nga Kavadari”, informojnë nga MPB-ja.
Pas ndërmarrjes së masave dhe sigurimit të informatave, me urdhër gjykate janë realizuar bastisje në shtëpinë e tij të pushimit dhe në objektet ndihmëse në vendin e quajtur „Vasov Grad“, në rrethinë të Kavadarit, si dhe në banesën ku jeton në Kavadar.
“Gjatë bastisjes në shtëpinë e pushimit, personi ka dorëzuar vullnetarisht një pushkë gjahu të markës „Zastava“, tre fishekë gjahu të kalibrit 12, rreth 13 kilogramë mish kaprolli dhe nëntë mjete të ndaluara për gjueti (kurthe), nga të cilat në njërin kishte mbetje të gjurmëve biologjike. Është njoftuar prokurori publik dhe pas zbardhjes dhe dokumentimit të plotë të rastit, ndaj personit do të ngrihen kallëzime për veprat penale „Gjueti e paligjshme“, sipas nenit 228, dhe „Përpunimi, mbajtja dhe tregtimi i palejuar i armëve dhe lëndëve shpërthyese“, sipas nenit 396 të Kodit Penal”, njoftojnë nga MPB-ja.
