Kryetari i Partisë Demokratike Sali Berisha e cilësoi sërish sot si “farsë elektorale”, zgjedhjet parlamentare të 11 majit.
Berisha tha në një konferencë për mediet se “komuniteti ndërkombëtar i shpalli të vdekura zgjedhjet 10 ditë përpara se të zhvilloheshin”
Sipas Berishës “rezolutat ndërkombëtare të CDI, IDU, PPE kanë denoncuar publikisht dhe me germa të mëdha shtetin si një sipërmarrje e përbashkët me krimin e organizuar. Kjo është e vërteta e pamohueshme”.
“Kjo është arsyeja ndër më kryesoret se pse komuniteti ndërkombëtar i qendrës së djathtë i dënoi me dënim kapital me datën 30 prill 2025, zgjedhjet që do zhvilloheshin 10 ditë më vonë në Shqipëri”, tha Berisha.
Sipas Berishës “cilido që lexon rezolutën e Valencias, konstaton se ajo rezolutë i thotë opinionit publik ndërkombëtar dhe shqiptarëve se në Shqipëri nuk do ketë zgjedhje por farsë elektorale”.
“Kjo është e vërteta absolute. Si për asnjë zgjedhje të tjera, unë nuk di në memorien e kohërave, që një zgjedhje të dënohet 10 ditë para zhvillimit. E them këtë sepse komuniteti ndërkombëtar kurrë nuk udhëhiqet nga paragjykimi”, u shpreh Berisha.
Berisha nënvizoi se “kemi të bëjmë një vdekje të paralajmëruar të procesit zgjedhor dhe zhvillimin e paralajmëruar të një farse të plotë zgjedhore”.
Berisha shtoi se PD kërkon qeveri teknike dhe zgjedhje të parakohshme.
“Normalisht vetëm zgjedhje të parakohshme. Pa diskutim. Qeveri teknike, me një axhendë të përcaktuar, problemet që zgjidhen direkt me integrimin dhe zgjedhjet e lira dhe të ndershme.
Kjo është kërkesa jonë, për të cilën do luftojmë me të gjithë mbështetësit tanë dhe miqtë tanë në Europë dhe në botë”, përfundoi Berisha.
