Menuja e darkës zyrtare gala e dhënë për nder të liderëve në kuadër të Samitit të 36-të të Kryetarëve të Shteteve dhe Qeverive të NATO-s të mbajtur në Kompleksin Presidencial u përgatit nga Fatih Tutak, shef kuzhine me dy yje Michelin.
Sipas deklaratës, liderët e 32 vendeve anëtare të NATO-s, krerët e ftuar të shteteve dhe delegacione të nivelit të lartë morën pjesë në darkën gala të organizuar nga presidenti turk, Recep Tayyip Erdogan.
Tutak, i cili në qendër të karrierës së tij ka vendosur përfaqësimin e kuzhinës turke në arenën ndërkombëtare, bashkoi trashëgiminë gastronomike të Turqisë me krerët botërorë në darkën zyrtare gala të Samitit të 36-të të Liderëve të NATO-s.
Menuja përfshinte bukë pite të pjekur me furrë guri me dru, gjalpë Trabzoni dhe mjaltë në hoje Hizan, perime me vaj ulliri dhe kos ”Denizli”.
Ajo përmbante edhe levrek deti dhe meze me vezë peshku, angjinarë nga Urla me gjethe rrushi Tokat, bullgur me kërpudha, brinjë viçi dhe domate të tymosura.
Nuk mungoi në menu edhe bakllavaja me qumësht si dhe akullore Marash me pistakë Antepi dhe bergamot.
“Ishte një nder i madh për ne që të përfaqësonim kuzhinën turke në një tryezë kaq të veçantë. Në këtë menu kishim dëshirën që përmes një gjuhe bashkëkohore të përshkruanim produktet e ardhura nga rajone të ndryshme të Turqisë, mundin e prodhuesve dhe kujtesën tonë të kuzhinës. Ishte shumë e vlefshme për ne që të ishim pjesë e këtij takimi të rëndësishëm të organizuar nga Turqia”, tha Tutak.
Menuja e paraqitur kishte në qendër diversitetin e produkteve rajonale të Anadollit, bashkëpunimet me prodhuesit vendas dhe kujtesën e rrënjosur thellë të kuzhinës turke.
Shijet tradicionale turke iu ofruan të ftuarve duke u riinterpretuar me teknika bashkëkohore dhe prezantime elegante.
Darka gala shkoi përtej të qenit thjesht një menu zyrtare ftese dhe u shndërrua në një rrëfim gastronomik që përfaqëson diversitetin e produkteve të Turqisë dhe kulturën e saj të kuzhinës.
