Oda Ekonomike e Tregtarëve me shumicë dhe pakicë i kanë dorëzuar ministrisë së ekonomisë propozimet e tyre për masa efektive për ulje të çmimeve të disa grupeve të produkteve.
Këtë për Alsat e konfirmoi kryetari i Odës Lavdrim Gega. Ai tha se për të mos dëmtuar procesin nuk mund të ndajë më tepër detaje për atë se sa produkte janë përfshirë në listë. Megjithatë, këto kërkesa nuk pritet të shqyrtohen shumë shpejt, ndoshta deri në fund të javës, duke pasur parasysh se edhe kryeministri Mickoski edhe ministri i ekonomisë Durmishi, janë në udhëtim jashtë vendit.
Ndërkohë deputeti i LSDM-së Fatmir Bytyqi, dyshon se formimi i Odës së re të tregtarëve mund të jetë skenar i Qeverisë për të krijuar paralelizëm për çdo zë të qytetarëve. Ai nuk pajtohet me pohimet e Inspektoratit të tregut dhe të odës tregtare se fajtor për çmime të larta janë prodhuesit dhe distributorët.
“Por ajo që më ra në sy është propozimi i tyre që për disa produkte mund të ulin marzhën deri në 30%. Pyetja që shtrohet është se ku është Qeveria që të ndalon dikë që marzha e fitimit mund të ulet deri në 30%, kurse sa është marzha reale?
Unë këtu nuk po flas për prodhuesit sepse ata janë më së paku fajtorë për këtë gjendje. Janë ata të cilët në shpinën e prodhuesve, në shpinën e qytetarëve krijojnë fitime marramendëse”, deklaroi Fatmir Bytyqi – LSDM.
