Shkup, 5 gusht – Shumë familje pësuan nga zjarret e fundit që përfshinë vendin. Organizata të ndryshme kanë nisur mobilizimin për të ndihmuar të prekurit.
Në Shkup është hapur një pikë për grumbullimin e ndihmave, e cila ndodhet afër qendrës tregtare “East Gate”.
Aksionin për mbledhjen e ndihmave e udhëheq organizata “Humanitarni akcii.mk”, në bashkëpunim me Konfederatën e Organizatave Sindikaliste, në zyrën e së cilës qytetarët do të mund të dorëzojnë donacionet e tyre.
Organizatorët theksojnë se donacionet në ushqime dhe veshmbathje janë më se të nevojshme.
“Çdo qytetar mund të sjellë donacione nga ora 4 deri në 8 pasdite. Donacionet që na duhen në fazën e parë janë veshmbathjet, ushqimet, dezinfektuesit, dyshekët, edhe pse tashmë kemi donacion të madh me dyshekë, batanije, çarçafë. Kështu që aktualisht shumë familje janë përkujdesur dhe duhet t’ua dërgojmë atë që është më elementare”, tha Vlladimir Çollakovski, organizata “Organizatat humanitare.mk”.
Çollakovski sqaron se donacionet nuk do të ndalen vetëm në rajonin e Ovçepolës, por më vonë do të mblidhen edhe për pjesët e tjera të vendit të prekura nga flakët.
“Tani do të shkojmë në Ovçepolë, e pastaj do të shkojmë në të gjithë Maqedoninë Lindore, sepse ka ende zjarre, nuk jemi të sigurt se ku dhe si do të ndodhë, kjo është një fatkeqësi e madhe kjo është një fatkeqësi kombëtare. Tani po bëhen marrëveshje në pikën e Prilepit, në pikën e Manastirit, në Ohër tashmë po organizohen, të shohim edhe qytetet tjera”, u shpreh Vlladimir Çollakovski, organizata “Organizatat humanitare.mk”.
Javën e kaluar janë dërguar dy dërgesa individuale me ndihma në Sveti Nikollë dhe në fshatin Nemanjcë, ku janë evakuuar më shumë banorë, ndërsa në periudhën e ardhshme priten pako më të mëdha të ndihmave në të gjitha pjesët ku zjarret kanë shkaktuar dëme materiale.
