Kryetarja e Kuvendit Elisa Spiropali reagoi sot në Ditën Ndërkombëtare të Përkujtimit të Holokaustit.
Spiropali u shpreh se kjo ditë për ne shqiptarët është një ditë e jashtëzakonshme.
“Në këtë ditë ne ndjehemi krenarë për miqësinë, dashurinë dhe mbrojtjen e hebrenjve”, tha Spiropali.
Ajo theksoi se, lidhjet e shqiptarëve me hebrenjtë janë të hershme e historike.
“Shqipëria ishte i vetmi vend, i cili në përfundim të Luftës së Dytë Botërore, kishte më tepër hebrenj se në fillim të saj. Është fakt i njohur botërisht se në Shqipëri hebrenjtë u mbështetën dhe u mbrojtën nga të gjithë shqiptarët, populli dhe institucionet, pavarësisht bindjeve politike apo përkatësive fetare”, u shpreh kryeparlamentarja.
Spiropali tha se, për nga kontributi për mbrojtjen dhe mbështetjen e hebrenjve, Shqipëria është njohur e vlerësuar si një atdhe tjetër, atdhe rezervë, për ta.
“Rezoluta mbi Antisemitizmin, miratuar nga Kuvendi dhe Forumi i Parë Ballkanik kundër Antisemtizmit, organizuar nga Kuvendi në tetor 2020, e kanë bërë Shqipërinë lidere rajonale në luftën kundër antisemitizmit”, theksoi kryetarja e Kuvendit.
“Antisemitizimi, si një zëdhënës i urrejtjes, ndarjes, luftës dhe armiqësisë, nuk drejtohet vetëm kundër hebrenjve, por kundër të gjithë qytetërimit, kundër vlerave të cilat ne mbrojmë dhe lartësojmë: dashurisë, bashkimit, paqes e solidaritetit mes njerëzve dhe mes popujve. Shkrimet e shenjta hebreje janë, mes tjerash, një udhëzues i mëkimit me këto vlera njerëzore. “Nuk mund të rrish duarkryq para gjakut të fqinjit tënd”, shkruhet, mes të tjerash, në këto mësime”, u shpreh Spiropali.
“Ne, shqiptarëve, na bën krenar fakti që mbrojtja e hebrenjve në trojet tona mësohet nga nxënësit e shkollave në Izrael, si një mirënjohje për marrëdhënien tonë të veçantë përgjatë shekujve”, tha Spiropali.
