Shkup, 5 tetor – Edhe kryetarët e ardhshëm të komunave do të shpëtojnë nga “përgjegjësia” apo shkarkimi përmes referendumit pasi propozim ligji për vetëqeverisje lokale nuk arriti të kalojë në Kuvend deri para se Kuvendi të shkojë në pushime. Kjo për arsye se shumica parlamentare nuk posedon shumicën e badenterit ndërsa ligji për vetëqeverisje lokale kërkon dhe badenter. Ndryshimet ligjore parashihnin mundësinë që qytetarët përmes një referendumi, të mund të shkarkojnë edhe kryetarët e komunave nëse nuk janë të kënaqur nga puna e tyre, por në këtë rast, kjo nuk do të jetë e mundur dhe edhe më tej nuk do të ketë asnjë mundësi tjetër ligjore nëse vet kryetari i komunës nuk jep dorëheqje.
Nuk do të ketë gjithashtu as polici komunale, respektivisht inspektorë të angazhuar për mirëmbajtjen e higjienës nëpër komuna dhe mundësia për shqiptimin e gjobave nëse qytetarët takohen duke hedhur mbeturina kabaste në hapësira publike. Kjo lë hapësirë që për shkak inateve politike në pushtetin lokal, qytetarët edhe më tej të përballen me mungesë të higjienës dhe me kontejnerë të stërmbushur.
Gjatë përpilimit të buxhetit të komunës, programeve dhe projekteve kryetarët e komunave do të duhej ta kishin obligim që t’i përfshijnë edhe qytetarët përmes tribunave apo anketimeve, diçka që tani ngelet në vullnetin e komunës.
Ajo që më së shumti kontestohej nga opozita ishte zvogëlimi i numrit të këshilltarëve në komuna të caktuara pasi ndryshimet e ligjit llogaritnin vetëm banorët rezident dhe jo edhe ato jo rezident. Kjo në fakt edhe pse nuk u miratua, Qeveria vetëm se i dërgoi vendim KSHZ-së me numër të caktuar të këshilltarëve nëpër komuna edhe pse ligji aktual nuk i ndanë banorët në rezident dhe jo rezident.
Përpos ligjit për vetëqeverisje lokale, për shkak mungesës së badenterit, në Kuvend nuk kaluan as ndryshimet e kodit zgjedhor. Nga shumica parlamentare janë të qëndrimit se të gjitha ndryshimet janë në përputhje me vërejtjet e OSBE/ODIHR-it, ndërsa sa i përket propozimit për një njësi zgjedhore dhe një kod të ri zgjedhor është formuar një grup pune në Ministrinë e Drejtësisë, dhe se VMRO-DPMNE është pro një njësie zgjedhore dhe votimit të diasporës. Siç theksohet në propozim-ndryshimet, zgjidhja ligjore synon përmirësimin e procesit zgjedhor dhe sigurimin e të drejtës së votës së barabartë, demokratike dhe të lirë, si dhe veprimin mbi rekomandimet e Misionit për vëzhgim të zgjedhjeve. Problemi kryesor si në këto zgjedhje por edhe në zgjedhjet tjera do të mbetet numri i nevojshëm për mbledhjen e nënshkrimeve për kandidatët e pavarur pas shfuqizimit të dy neneve për këtë çështje nga ana e Gjykatës Kushtetuese./Alsat.mk
