Presidenti i Turqisë, Tayyip Erdogan, tha se presidenti amerikan Donald Trump i kishte kërkuar Turqisë të ndihmonte në bindjen e Hamasit për të mbështetur planin e tij për të përfunduar luftën në Gaza, dhe se Turqia i kishte shpjeguar grupit se çfarë duhet të bëhej, sipas “Reuters”.
Hamas tha sot se kishte shkëmbyer një listë emrash të të burgosurve palestinezë dhe izraelitë që do të liroheshin në kuadër të një marrëveshjeje shkëmbimi, duke shprehur optimizëm për bisedimet në Egjipt mbi planin e Trump.
Turqia, e cila ka shprehur mbështetje për planin dhe ka marrë pjesë në negociatat në Egjipt, ka qenë një nga kritikët më të zëshëm të ofensivës izraelite, të cilën e quan gjenocid. Ajo ka ndaluar të gjitha tregtitë me Izraelin, ka kërkuar masa ndërkombëtare ndaj qeverisë së tij dhe ka kërkuar një zgjidhje me dy shtete.
Në komentet për gazetarët gjatë një fluturimi nga Azerbajxhani, Erdogan tha se zyrtarët turq ishin të përfshirë sot në negociatat në Sharm el-Sheikh të Egjiptit , dhe shtoi se Trump i kishte kërkuar Turqisë të bindë Hamasin të pranojë propozimin.
“Ne kemi qenë në kontakt me Hamas gjatë gjithë këtij procesi. Jemi në kontakt me ta edhe tani”, tha Erdogan, sipas transkriptit të komenteve të tij të shpërndara nga zyra e tij.
“Ne po u shpjegojmë atyre se cili është mënyra më e përshtatshme, çfarë duhet të bëhet që Palestina të ecë me përkushtim në të ardhmen”.
“Si gjatë vizitës sonë në Amerikë, ashtu edhe në telefonatën tonë të fundit, i shpjeguam zotit Trump se si mund të arrihet një zgjidhje në Palestinë”, tha ai, duke iu referuar vizitës së tij në Shtëpinë e Bardhë muajin e kaluar.
“Ai specifikisht kërkoi që ne të flisnim me Hamasin dhe t’i bindnim ata. Ne u morëm shpejt në kontakt me homologët tanë për këtë”, shtoi ai.
Kryetari i inteligjencës turke, Ibrahim Kalin, i cili mori pjesë në raundin e fundit të bisedimeve në Doha, është i përfshirë në negociatat në Egjipt.
Duke u pyetur për një mundësi të vendosjes së trupave turke në Gaza pas luftës dhe mënyrat për të siguruar sigurinë në enklavë, Erdogan tha se bisedimet në Sharm el-Sheikh ishin thelbësore për diskutimin e detajeve, por prioriteti ishte arritja e një armëpushimi të plotë, sigurimi i dërgesave të ndihmës dhe rindërtimi i Gazës.
Ankara është e gatshme të kontribuojë në të gjitha përpjekjet në Gaza pas luftës, tha ai, duke shtuar se Gaza duhet të jetë pjesë e një shteti palestinez dhe të qeveriset nga palestinezët.
