Tiranë, 22 shtator, argument.mk/ – “Farma Sotira” në Kolonjë, një nga sipërmarrjet më të njohura në vend, mbetet një shembull suksesi sa i takon investimeve në agroturizëm.
Një atraksion i jashtëzakonshëm turistik, në juglindje të vendit, “Farma Sotira” vizitohet nga mijëra turistë të huaj, duke prodhuar jo vetëm ekonomi për familjen, por edhe turizëm dhe punësime për banorët e zonës.
Kryeministri Edi Rama ndau në rrjetet sociale pamje nga “Farma Sotira” në Kolonjë, e pozicionuar mes pyjeve të Gërmenjit.
Sipas Ramës, ferma sjell natyrën, traditën, prodhimet e freskëta dhe mikpritjen shqiptare në një përvojë të veçantë agroturizmi.
“Farma Sotira” në Kolonjë është vlerësuar me Çmimin Ndërkombëtar të Agroturizmit 2024 në Kongresin Ndërkombëtar të Agroturizmit, që u zhvillua në muajin maj në Bolzano të Italisë.
Në ambientet e “Farmës Sotira” ofrohet mikpritja e përsosur për turistët, të cilët gjejnë akomodim, ushqim me produkte të zonës, hipizëm, kamping e deri tek “apiterapia” një metodë inovative e oksigjenimit të mushkërive, që funksionon përmes koshereve të bletëve.
