Shkup/Dallas, argument.mk/ – Diplomati dhe aktivisti shqiptar me bazë në Dallas të SHBA-së, Fatlum Rushiti, po angazhohet në mbështetje të ish-krerëve të Ushtrisë Çlirimtare të Kosovës (UÇK), të cilët po përballen me proces gjyqësor në Dhomat e Specializuara të Kosovës në Hagë, transmeton argument.mk/.
Sipas raportimeve të publikuara nga media amerikane Dallas Observer, Rushiti është përfshirë në përpjekje për mobilizimin e diasporës shqiptare në Evropë, Shtetet e Bashkuara, Kanada, Australi dhe vende të tjera, me synim që të rritet mbështetja publike dhe institucionale për ish-krerët e UÇK-së.
Në këto aktivitete, sipas raportimeve, ai ka kërkuar mbështetje nga përfaqësues të institucioneve amerikane dhe figura të ndryshme publike, përfshirë kongresistë, senatorë, guvernatorë dhe profesorë universitarë.
Rushiti, me prejardhje nga Kërçova, është i njohur për angazhimin e tij në çështje që lidhen me komunitetin shqiptar dhe diasporën. Aktiviteti i tij në SHBA është shtrirë edhe në kontakte me përfaqësues të institucioneve politike dhe akademike.
Angazhimi i tij vjen në një periudhë kur proceset gjyqësore ndaj ish-krerëve të UÇK-së në Hagë mbeten në fokus të opinionit publik shqiptar dhe të organizatave të diasporës.
Sipas raportimeve të cituara, përmes kontakteve dhe mobilizimit të diasporës, Rushiti synon të përcjellë kërkesën për lirimin e ish-krerëve të UÇK-së te institucionet dhe përfaqësuesit politikë amerikanë dhe ndërkombëtarë.
