Teheran, 26 gusht, argument.mk/ – Bisedimet mes Iranit dhe Omanit për rregulla të reja të lundrimit në Ngushticën e Hormuzit po shënojnë progres.
Ministri i Jashtëm i Omanit, Badr al-Busaidi tha se së shpejti, mund të shpallet një korridor i përkohshëm për kalimin e anijeve.
“Shpresoj që së shpejti të njoftojmë një korridor të përkohshëm për Ngushticën e Hormuzit dhe masa praktike për rikthimin e lundrimit të sigurt”, shkroi sot al-Busaidi në X, pas takimit me homologun iranian, Abbas Araghchi.
Televizioni shtetëror iranian IRIB publikoi një deklaratë të përbashkët të Iranit dhe Omanit, sipas së cilës të dy vendet diskutuan një qasje hap pas hapi, për vendosjen e rregullave të reja të lundrimit, si dhe për operacionet e çminimit në ngushticë.
Irani dhe Omani, të cilët kanë dalje në këtë rrugë ujore strategjike, prej disa javësh po negociojnë për këtë çështje.
Ngushtica e Hormuzit është një pikë kyçe për tregtinë ndërkombëtare të energjisë.
Irani e ka kufizuar ndjeshëm trafikun detar në ngushticë, që nga nisja e sulmeve amerikano-izraelite në fund të shkurtit.
Teherani ka kërkuar që anijet që kalojnë nëpër ngushticë të lundrojnë vetëm përgjatë bregdetit iranian.
Ndërkohë, Shtetet e Bashkuara të Amerikës kanë vendosur një bllokadë detare ndaj porteve iraniane.
Sipas një marrëveshjeje kuadër, të arritur mes Iranit dhe SHBA-së, në mesin e qershorit, një marrëveshje afatgjatë për lundrimin në Ngushticën e Hormuzit duhet të negociohet mes Iranit dhe Omanit, në përputhje me të drejtën ndërkombëtare dhe me pjesëmarrjen e vendeve fqinje.
