Shkup, 5 shkurt – Në edicionin e lajmeve qendrore në TV Alsat M, kryetari i Lëvizjes Demokratike Izet Mexhiti mes tjerash tha: “Shqiptarët që moti janë përcaktuar për ndryshim në skenën politike, problemi ka qenë te opozita shqiptare që ska qenë e bashkuar dhe ska pas një program dhe vizion për bashkim.
Por kësaj rradhe duke qenë vetëkritik po e evitojmë dhe përmirësojmë këtë dobësi tonën dhe po bashkohemi ku fokus është fitorja dhe ndryshimi dhe jo vetëm ndërrimi i kësaj klike të korruptuar në pushtet, që do të thotë, do të bëjmë ndryshim në qasjen, ndryshim në qeverisje.
Motivi kyç i bashkimit të partive politike shqiptare nuk ka qenë për numra dhe pazare, por për të sjellë ndryshimin në skenën politike të Maqedonisë së Veriut, ku në rend të parë do të jetë interesi i qytetarit shqiptar dhe për ta realizuar ndryshimin e shumëpritur te shqiptarët”, ka deklaruar Mexhiti.
Izet Mexhiti mes tjerash tha: “Kësaj radhe ne jemi bashkuar në Lidhjen Evropiane për Ndryshim, bashkërisht me Aleancën për Shqiptarët dhe Vetëvendosjen për parime, pra parimet janë ata të cilat na bashkojnë, kemi bërë shtyllat e programit me të cilat do të dalim para qytetarëve dhe dua të dërgoj një porosi të fuqishme deri tek shqiptarët dhe përkrahësit tonë, se gjithë kjo energji pozitive që kërkon ndryshim assesi nuk mund të prishet për një numër ose për një emër apo për një ngjyrë partiake. Kjo kauzë është shumë më e madhe se kush sa deputet do të ketë dhe se kush do të jetë deputet”, ka thënë Mexhiti.
Sipas Mexhitit ka një thënie – Popullit dhe ujit mos i dil përpara!
“Pra porosia jonë është se kësaj radhe ndryshimin nuk e duan vetëm subjektet opozitare, për ndryshim është përcaktuar populli shqiptarë, këtë e dëshmojnë edhe rezultatet nga 2011-ta e këndej, janë të evidentuara në KSHZ, pra populli ka vendosur për ndryshim dhe kushdo që do të përballet me popullin vetëm do të koritet dhe do të njolloset edhe më tepër”, ka thënë Mexhiti.
