Shkup, 7 maj – Ministrja e Arsimit dhe Shkencës, Vesna Janevska bëri të ditur se së shpejti do të tejkalohet problemi me studentët të cilëve iu ndërpre e drejta për racion të subvencionuar studentor këtë muaj për shkak se marrin pension familjar për shkak të prindit të ndjerë.
Pas reagimeve nga studentët, Janevska deklaroi se e ka marrë informacionin dhe se bëhet fjalë për 181 studentë që mbi këtë bazë “nuk morën racion studentor këtë muaj”.
Ajo theksoi se problemi po zgjidhet dhe do të tejkalohet sa më shpejt të jetë e mundur, duke shtuar se ka edhe studentë të tjerë që janë refuzuar për shkaqe tjera.
“E mora këtë informacion. Është paraqitur një problem në bashkëpunim me institucione të tjera dhe për momentin po e zgjidhim në mënyrë aktive për të parë se çfarë ka ndodhur në fakt. Ka edhe studentë të tjerë që refuzohen për shkaqe të tjera. Megjithatë, ne do ta zgjidhim këtë sa më shpejt të jetë e mundur, pra që gjatë ditës”, ka thënë Janevska duke iu përgjigjur pyetjes së gazetarëve para hapjes së një seminari për shkollat.
Ministrja tha se studentët kanë të drejtë që çdo muaj të aplikojnë për subvencionin. Maji është muaji i fundit për këtë vit akademik, derisa thirrja e radhës do të jetë në shtator.
