Shkup, 25 shkurt – Gjithsej 34 raste të dhunës nga bashkëmoshatarët janë raportuar në Ministrinë e Arsimit, por nuk është raportuar asnjë rast i dhunës përmes internetit, tha sot ministrja e Arsimit dhe Shkencës, Vesna Janevska, para nxënësve aktivistë, të cilët prezantuan iniciativat e tyre për një mjedis dixhital më të sigurt dhe raportimin e bullizmit kibernetik.
Sipas nxënësve, dhuna onlajn ekziston, por, siç thonë nga zyra e UNICEF-it në Shkup, deri më tani nuk është raportuar zyrtarisht asnjë rast i tillë.
“Gjithsej 34 raste të dhunës nga bashkëmoshatarët janë raportuar në Ministrinë e Arsimit, por nuk është raportuar asnjë rast i dhunës onlajn, ndërsa ju thoni se ka. Do t’ju inkurajoja, nëse mendoni se mund t’ju ndihmojmë, ndërsa ne mundemi, kur të hasni një dhunë të tillë, ta raportoni atë sepse ne kemi shërbime profesionale që do të punojnë me shërbimet shkollore dhe mësimdhënësit, ndërsa nëse është e nevojshme me autorin, si dhe me viktimën, nëse na kontaktojnë. Jini urë lidhëse midis internetit dhe shërbimeve profesionale. Inkurajoni bashkëmoshatarët tuaj sepse e kuptoj që ju e kuptoni njëri-tjetrin më shumë, që të rinjtë kanë nevojë për të rinj, por mos i përjashtoni të rriturit. Ndonjëherë edhe ato mund të jenë të dobishme”, potencoi ministrja Janevska.
Sipas ministrit të Transformimit Dixhital, Stefan Andonovski, i cili gjithashtu dëgjoi edhe iniciativat e nxënësve aktivistë, tha se, përveç punës me të rinjtë, në lidhje me bullizmin kibernetik është shumë e rëndësishme të punohet edhe me prindërit.
“Shpesh e përsërisim fjalinë që prindërit nuk mësohen të merren me dhunën kibernetike dhe bullizmin-kibernetik sepse ndoshta kjo nuk ekzistonte në kohën kur ata po rriteshin dhe po arsimoheshin. Tani është një kohë më ndryshe, e cila sjell këtë sfidë të madhe. Kjo është arsyeja pse është shumë e rëndësishme të punohet me prindërit, por edhe me të gjithë partnerët – shkollat, edukatorët, bashkëpunëtorët profesionalë dhe, sigurisht, mbi të gjitha me të rinjtë. Ne e kemi realizuar projektin ‘Qendra për një internet më të sigurt’ dhekëto mësime i mësuam vitin e kaluar, por projekti vazhdon. Si institucione, ne jemi në dispozicionin tuaj për të gjitha këto çështje që ju i inicioni”, theksoi Andonovski.
Siç informoi Aleksandra Ivanovska nga zyra e UNICEF-it në Shkup, në përgjithësi nuk ka raportime zyrtare për dhunë onlajn.
“Deri më tani, ato janë për dhunën e drejtpërdrejtë nga bashkëmoshatarët, por jo për dhunën onlajn. MPB-ja ka një mekanizëm të quajtur “butoni i kuq” për raportimin e çdo lloj dhune, përfshirë dhunën në fushën dixhitale. Fatkeqësisht, kjo nuk dihet mjaftueshëm dhe nuk kemi një numër të madh raportimesh. Konkretisht, vitin e kaluar pati rreth katër raportime përmes “butonit të kuq”, megjithëse e dimë se kjo është për të gjitha llojet e dhunës”, theksoi Ivanovska.
Nxënësit të cilët janë pjesë e inciativës #Net pa hejt sot prezantuan aktivitetet e tyre, fushatën e ardhshme dhe manualin – të gjitha që synojnë trajtimin e dhunës në internet, të cilat duhet të përfundojnë deri në fund të vitit.
