Shkup, 29 shtator, argument.mk/ – Me rastin e shënimit të Ditës Botërore të Zemrës – 29 shtator, ministri i shëndetësisë, Sasho Klekovski vizitoi pikën për kontrolle falas, në organizim të Institutit për Shëndet Publik në qendrën tregtare “Diamond Mall”, me qëllim ngritjen e vetëdijes për parandalimin e sëmundjeve kardiovaskulare.
Këtë vit Dita Botërore e Zemrës shënohet nën sloganin: “Sëmundja e zemrës mund të jetë e padukshme: Kap ritmin e zemrës! Mos e humb asnjë rrahje!”. Fokusi është në njohjen e simptomave të fshehura, edukimin e popullsisë dhe aktivitetet e orientuara drejt sigurimit të qasjes universale në kujdesin kardiologjik dhe skriningjet parandaluese.
Në pikën e ISHP-së qytetarët patën mundësi falas të matin nivelin e tensionit të gjakut, sheqerit në gjak, kolesterolit, si dhe gjatësinë dhe peshën trupore, me çka u mundësua llogaritja e indeksit të masës trupore (BMI) – një nga indikatorët e rrezikut nga sëmundjet e zemrës.
Vdekshmëria nga sëmundjet kardiovaskulare është një nga rreziqet më të mëdha në botë. Faktorët që i shkaktojnë këto sëmundje mund të parandalohen dhe të zbulohen me kontrolle të thjeshta. “Apeloj qytetarët rregullisht të kontrollojnë tensionin e gjakut, glikeminë, dhe nëse ka nevojë të marrin terapi të përshkruar nga mjeku, vetëm në atë mënyrë do ta mbrojmë shëndetin”, theksoi ministri Klekovski.
Drejtoresha e Institutit për Shëndet Publik, Marija Andonovska, theksoi se qëllimi i kësaj aktiviteti në terren është ngritja e vetëdijes për sëmundjet kardiovaskulare.
