Ushtarët koreano-veriorë, të cilët u dërguan të luftonin në anën e Rusisë në luftën kundër Ukrainës, nuk janë parë në front ka disa javë, duke nxitur spekulime se ata janë tërhequr pas humbjeve të mëdha, ka njoftuar shërbimi i inteligjencës i Koresë së Jugut. Shërbimi Kombëtar i Inteligjencës i Koresë së Jugut ka konfirmuar këtë javë raportet mediatike që thonë se trupat koreano-veriore janë tërhequr nga linja e parë e frontit në mesin e janarit.
Koreja e Veriut dërgoi rreth 11 mijë ushtarë në rajonin rus të Kurskut në fund të vitit 2024, menjëherë pasi lideri koreano-verior, Kim Jong-un dhe presidenti rus, Vladimir Putin nënshkruan një marrëveshje për mbrojtje të përbashkët, me qëllim forcimin e aleancës kundër, siç thanë ata, “hegjemonisë perëndimore të udhëhequr nga SHBA-të”.
Në muajin janar, presidenti ukrainas, Volodymyr Zelensky shpërndau një video të dy ushtarëve koreano-veriorë të kapur, njëri prej të cilëve tha se komandantët e kishin udhëzuar të shkonin për “trajnim ushtarak”.
Ushtarët koreano-veriorë, të cilët nuk kishin përvojë luftarake më parë, thuhet se nuk ishin të përgatitur për kushtet e ashpra të luftës në terren të panjohur, dhe ishin veçanërisht të pambrojtur ndaj droneve ukrainase. Shërbimi i inteligjencës i Koresë së Jugut thotë se janë gjetur shënime tek ushtarët e vrarë, të cilat sugjerojnë se regjimi i Koresë së Veriut priste që ata të kryenin vetëvrasje në vend që të kapeshin.
Koreja e Veriut shpreson se do të marrë në këmbim teknologji të avancuar satelitore ruse dhe do të sigurojë valuta të huaja për financimin e programit të saj bërthamor dhe balistik.
Shërbimi i inteligjencës i Koresë së Jugut thotë se humbjet e mëdha ndër ushtarët koreano-verior janë një nga arsyet kryesore për tërheqjen e tyre nga Kursku, ku forcat ukrainase nisën një ofensivë të papritur në gusht të vitit 2024.
Koreja e Veriut ende nuk ka pranuar zyrtarisht rolin e saj në luftë, por në tetor të vitit të kaluar, Putin shmangu të mohojë praninë e trupave koreano-veriore në Rusi.
