Deputetja e Partisë së Lirisë, Monika Kryemadhi është paraqitur sot në dyert e Prokurorisë së Posaçme kundër Korrupsionit dhe Krimit të Organizuar për të ankimuar vendimin e GJKKO-së në lidhje me sekuestrimin e dy vilave në zonën e “Kodrës së Diellit”. Kryemadhi tha se të gjitha veprimet e gjykatës janë “presione tipike provinciale dhe bolshevike”.
“Me atë çfarë kemi parë së fundmi, është qesharake, joprofesionale, por është një procedurë që duhet ta ndjek hap pas hapi për të ecur përpara në procedurat e tjera ligjore që na takojnë. Prokuroria ka ndjekur truke që nuk i ka regjistruar si procedime penale, por kur ime më është paraqitur në SPAK pa avokat, pavarësisht kushteve, moshës, kur i është kontrolluar banesa si person në dijeni, duhet të ishte e shoqëruar me një avokat. Nuk kemi ndonjë shpresë nga Gjykata e Apelit se nga ajo që pamë herën e fundit, shikojmë një presion psikologjik dhe kërcënim ndaj gjyqtarëve të sistemit të drejtësisë. Kjo gjë do përfundojë në Strasburg, që nga shkelja e të drejtave të njeriut, të drejtës së pronës”, pohoi ajo.
E pyetur nga gazetarët për një protestë të thirrur nga Partia e Lirisë para SPAK, Kryemadhi u tha se “nuk merret me politikë, por ka filluar një profesion tjetër, si ndihmës avokate”. “Me çfarë po lexoj dhe çfarë po shikoj, të keqen e gjyqtarëve dhe prokurorëve të plepave të Sali Berishës në ‘90”, tha Kryemadhi.
Me kërkesën e Strukturës së Posaçme kundër Korrupsionit dhe Krimit të Organizuar, Gjykata e Posaçme e Shkallës së Parë kundër Korrupsionit dhe Krimit të Organizuar ka vendosur sekuestro preventive ndaj dy pronave në pronësi të deputetes Monika Kryemadhi dhe nënës së saj Fatime Kryemadhi.
Pasuritë e sekuestruara janë një ndërtesë në Selitë, Tiranë me sipërfaqe; kati përdhes, 152 m2, nga të cilat 82 m2 banesë dhe 70 m2 verandë; kati nëntokë 139 m2, kati i parë 79 m2, kati i dytë 51 m2, verandë kati i dytë 27.9 m2, në pronësi të shtetases Fatime Kryemadhi, me adresë Rezidenca “Kodra e Diellit”.
Po ashtu një ndërtesë në Selitë, Tiranë me sipërfaqe kati përdhes 152 m2, nga të cilat 82 m2 banesë dhe 70 m2 verandë, kati nëntokë 139 m2, kati i parë 79 m2, kati i dytë 51 m2, verandë kati i dytë 27.9 m2, në pronësi të M.K., me adresë Rezidenca “Kodra e Diellit”.
Monika Kryemadhi ndodhet nën hetim nga SPAK për pastrim parash, fshehje pasurie dhe korrupsion për çështjen CEZ-DIA dhe lobimin në SHBA.
