Kryeministri në dorëheqje, Albin Kurti, me të dalë nga objekti i Kuvendit të Kosovës, tha vetëm shkurt se e ka dhënë më herët deklaratën, duke iu referuar deklaratës së publikuar në rrjetin social Facebook, raporton Ekonomia Online.
“E kam dhënë një deklaratë tashmë të shkurtër, të cilën mund ta lexoni”, ka thënë Kurti.
Më herët, Kurti, reagoi ashpër pas votës kundër të partive opozitare – PDK, LDK, Lista Serbe dhe AAK – ndaj raportit të Komisionit për verifikimin e mandateve të deputetëve. Ai e cilësoi këtë veprim si një sulm institucional ndaj Republikës së Kosovës dhe procesit demokratik.
“Deputetët e opozitës PDK, LDK, Lista Serbe dhe AAK sot votuan kundër raportit të komisionit për verifikimin e mandateve. Në një votim krejt formal e teknik që bazohet në dokumentacionin e KQZ-së, ata u rebeluan kundër betimit të deputetëve dhe konstituimit të legjislaturës së nëntë. Ky është sulm brenda institucional kundër Republikës së Kosovës dhe zgjedhjeve demokratike. Kjo është situatë e paparë në shtetin tonë e shumë më gjerë. Ne qeverisim mbarë e mirë, këta lanë nam e bëjnë lajm të keq për shtetin tonë. Se janë kundër qeverisë e Republikës dihet, por se janë edhe kundër vetvetes, këtë e mësuam sot’, u shpreh në Facebook Kurti.
