Ishulli grek, Santorini është përballur me disa tërmete të njëpasnjëshme, ditëve të fundit.
Në 48 orët e fundit pranë ishullit janë regjistruar më shumë se 300 tërmete, dhe disa ekspertë paralajmërojnë se lëkundjet mund të vazhdojnë për javë të tëra. Ndërkohë, mijëra banorë janë larguar nga ishulli.
Eduard Gjopalaj, banor në Santorini tha në studion e “Vizioni i Pasdites” se sipas ekspertëve pritet një tërmet shumë i fuqishëm, i shkallës 6 Rihter.
Ai gjithashtu shtoi se shtëpitë në Santorini janë të ndërtuara në mënyrë që ti rezistojnë tërmeteve.
Banori në ishullin grek tha se nuk duhet të ketë panik, por duhet të ndiqen këshillat e ekspertëve.
Gjopalaj: Janë rreth 500 tërmete që kanë ndodhur, 100 janë mbi 4-ballë. Para dy orësh kishim edhe një 5-ballë. Çdo moment ka një tërmet, edhe para dy minutash ra një. Unë kam vendosur të rri akoma. Këtu ndërtesat janë 2 katëshe dhe rezistojnë tërmeteve, ndërsa ndërtesat e vjetra janë më të rrezikuara. Ka të bëjë edhe zona, këtu ku banoj unë është më ndryshe. Kam 30 vite që jetoj këtu, jemi mësuar me tërmetet. Kjo situatë që po ndodh tani, edhe për ekspertët, është serioze. Çdo 15-20 minuta bie një tërmet. Fëmijët i kam larguar nga ishulli, unë vetë nuk lëviz, vetëm nëse na kërkohet. Por, po të jesh i kujdesshëm, nuk ka frikë, ndërtesat janë të ndërtuara mirë. Frika është tek vullkani, ende nuk ka asnjë shenjë se do të jetë aktiv. Pjesa më e madhe e familjarëve të mi kanë ikur. Puna është pezulluar këtu. Na është sugjeruar të jemi të qetë dhe të ndjekim këshillat e ekspertëve. Për momentin çdo gjë është nën kontroll. Ekspertët presin një tërmet kryesor që të zhduk fenomenin. Sa më shumë të vazhdojmë kështu, aq më i madh do të jetë tërmeti kryesor. Tërmeti, siç thonë ekspertët, mund të jetë i shkallës 6 Rihter.
