Shkup, 2 korrik, Zhurnal.mk – Pas shfuqizimit me forcë të Qeverisë teknike, Hristijan Mickoski dëshiron të imponojë modele autokratike. Tani kërkon ligj zgjedhor me të cilin askush nuk do të kontrollojë rreth 200.000 vota, akuzoi edhe sot LSDM, duke paralajmëruar në praktikë se mbetet te dhjetë mijë amendamentet me të cilat synon të pengojë miratimin e ndryshimeve të Kodit Zgjedhor, raporton Nezavisen, transmeton Zhurnal.
“VMRO‑DPMNE dëshiron që votat e diasporës, të cilat do të arrijnë përmes internetit, të mos kenë asnjë kontroll. Ndërkohë që qytetarët tanë që votojnë në atdhe kalojnë kontroll të rreptë para votimit – madje edhe gjurmë gishti, verifikim dokumentesh, nënshkrim në listën zgjedhore – Mickoski dëshiron të ketë mundësi absolute për vjedhje përmes votimit në distancë. Flasim për VMRO‑në, partinë që e dimë si i manipulonte zgjedhjet në kohën e Gruevskit. Tani nxënësi i tij më i mirë dëshiron ta përmirësojë sistemin e mentorit të vet”, thonë nga LSDM.
Partia kujton se në dhjetor në SHBA u hap një hetim për vjedhje votash, i cili tregoi se serverët e përfshirë në këtë proces ishin në pronësi të një kompanie serbe dhe biznesmenëve të afërt me Aleksandar Vuçiç dhe SNS.
“Të gjithë e dimë për marrëdhëniet mes Vuçiçit dhe Mickoskit, për lidhjen e tyre ‘vëllazërore’ dhe partitë motra. E dimë për përdorimin e së njëjtës platformë botësh dhe fermave të trollëve për ndikim në rrjetet sociale. E dimë edhe për 40 për qind të mediave në Maqedoni që janë në pronësi të ‘vëllait të madh’ Orban, në shërbim të VMRO‑s dhe Mickoskit. E dimë edhe për Latasin, i cili është njeriu kryesor për mediat dhe politikën redaktuese në emër të Mickoskit. E dimë edhe për dëshirat e fundit dhe këmbënguljen e Mickoskit për të shtyrë përpara qendrat e të dhënave në Maqedoni, edhe pse janë në dëm të ekologjisë dhe me konsum të pakontrolluar të energjisë elektrike që mund të shkaktojë probleme në furnizimin e amvisërive. E dimë edhe kush merret me importin e energjisë elektrike me partnerin e tij të biznesit nga Serbia, konsullin e nderit. Tani gjithçka është e njohur. Dhe pyetja është e qartë:
A janë këto arsye të mjaftueshme që LSDM të mos lejojë miratimin e këtij ligji?”, porosit opozita.
Sipas LSDM‑së, edhe pse Mickoski paralajmëroi tërheqje, “të gjithëve u është e qartë se ai nuk ka një ide të tillë”.
“Ashtu siç i shfuqizoi nënkryetarët në VMRO, ashtu udhëheq edhe në Qeveri. Autoritarizëm i plotë, të cilit i nevojitet edhe votim me buton. Për jetën e tij të rehatshme dhe luksin, pushteti i është i domosdoshëm. Vetëm sa është në pushtet mund të shkojë edhe në det, pa i dhembur gjunjët”, vlerësuan me sarkazëm nga LSDM.
Nga VMRO‑DPMNE, ndërkaq, vazhduan të pretendojnë se pas muajsh bisedimesh, harmonizimesh dhe pranimi të vërejtjeve nga LSDM dhe Levica, pikërisht këto parti tani e bllokojnë miratimin e Kodit Zgjedhor dhe se presioni është aq i madh, sa “po shpërthen nga të gjitha anët”.
“LSD dhe Levica morën pjesë në hartimin e tekstit, por sot paraqesin dhjetëra mijëra amendamente me qëllimin e vetëm për të bllokuar miratimin e Kodit Zgjedhor dhe për të ngadalësuar proceset reformuese. Kodi Zgjedhor është harmonizuar me rekomandimet e OSBE‑s dhe ODIHR‑it dhe përbën pjesë të detyrimeve reformuese të Maqedonisë. Në vend të konstruktivitetit, LSD dhe Levica zgjodhën teatër politik, të vetëdijshëm se çdo vonesë nënkupton dëm për shtetin dhe për procesin reformues evropian.
Nëse LSD dhe Levica vërtet kanë vërejtje thelbësore, le t’i propozojnë. Askush nuk ikën nga debatet e argumentuara. Por dhjetëra mijëra amendamente nuk janë përpjekje për përmirësim të ligjit, por opstruksion klasik parlamentar.
Qëndrimi i VMRO‑DPMNE‑së është i qartë. Jemi të gatshëm të bisedojmë për të gjitha propozimet që kontribuojnë për një proces zgjedhor më të mirë. Njëkohësisht, mbetemi të palëkundur në përcaktimin që diaspora maqedonase të marrë mundësinë të votojë në mënyrë elektronike në zgjedhjet presidenciale, sepse çdo qytetar maqedonas, pavarësisht ku jeton, meriton ta realizojë më lehtë të drejtën e tij demokratike. Është e qartë se frika nga humbja zgjedhore i ka bashkuar LSD‑në dhe Levicën më shumë se çdo ide politike. Në vend që të ofrojnë vizion, ata ofrojnë bllokada. Në vend të reformave, prodhojnë kriza.
VMRO‑DPMNE nuk do të lejojë që kalkulimet politike të jenë mbi interesat e shtetit. Reformat do të vazhdojnë, institucionet do të funksionojnë, ndërsa qytetarët vetë do të vlerësojnë kush punon për Maqedoninë dhe kush punon vetëm për shpëtim ditor politik”, janë të bindur nga VMRO‑DPMNE.
