Shkup, 30 qershor – Zv. kryeministri i parë, Izet Mexhiti, ka reaguar ashpër ndaj Bashkimit Demokratik për Integrim (BDI), duke e akuzuar këtë parti për mungesë vizioni opozitar dhe për përpjekje për rikthim në pushtet përmes “skenarëve destabilizues dhe urrejtjes ndëretnike”.
Sipas Mexhitit, prapa këtyre skenarëve qëndron një “shef në arrati” i dezinformatave, i cili, sipas tij, financohet nga struktura ruso-serbe përmes rrjeteve të bixhozit dhe kazinove, të cilat janë futur në vend nga vetë BDI.
“Skenarët po i udhëheq “shefi në arrati” i lajmeve të rrejshme, i financuar nga nëntoka ruso-serbe e instaluar përmes bixhozit dhe kazinove që i solli vetë BDI në vend.
Dështuan me Taravarin. Dështuan me Danella Arsovskën. Tani fajësojnë VLEN-in për çdo dështim të tyre!
E hoqën Balancuesin vetë, pastaj thanë: “VLEN e ka fajin!”; E lanë ligjin për gjuhën shqipe të papërfunduar, dhe sërish: “VLEN e ka fajin!”; Regjistruan mërgatën me metodologji që vetë e propozuan, sot, VLEN ua ka fajin!; Ky është manuali i propagandës së vjetër: shpikje, përçarje dhe viktimizim”, shkruan Mexhiti në Facebook.
Mexhiti shton se shqiptarët nuk i besojnë më atyre që ikën nga drejtësia dhe kërkojnë të rikthehen përmes kaosit.
