Shkup, 23 qershor, Zhurnal.mk – Kryeministri Hristijan Mickoski deklaroi se Qeveria dhe zinxhirët më të mëdhenj të marketeve kanë arritur marrëveshje për të punuar në uljen e rritjes së çmimeve të produkteve bazë ushqimore, me qëllim që në korrik inflacioni vjetor i ushqimit të jetë nën tre për qind.
“Një nga këto synime është që, në muajin korrik, norma vjetore e ndryshimit të çmimeve të produkteve bazë ushqimore të mos jetë më e lartë se 3%, pra të jetë nën 3%. U pajtuam të gjithë se për ta realizuar këtë është e nevojshme të zhvillojmë një takim të tillë me prodhuesit, distributorët dhe furnizuesit,” tha Mickoski.
Ai theksoi se Qeveria do të vazhdojë bisedimet me të gjithë aktorët në zinxhirin e furnizimit, me qëllim që qytetarët të përfitojnë nga çmime më të ulëta.
Në pyetjen se çfarë do të ndodhë nëse marrëveshja nuk respektohet, Mickoski tha se Qeveria tashmë po analizon hapat e mundshëm dhe zgjidhjet ligjore.
“Po analizojmë të gjitha rrethanat objektive që ata i paraqitën dje, si dhe mundësinë e ndryshimit të disa zgjidhjeve ligjore për realizim më të suksesshëm të këtij synimi,” deklaroi kryeministri.
Ai njoftoi gjithashtu se Inspektorati Shtetëror i Tregut do të përgatisë një analizë krahasuese të çmimeve mes furnizuesve dhe marketeve.
“Inspektorati Shtetëror i Tregut ka marrë detyrë të bëjë një analizë krahasuese mes çmimeve të të njëjtit produkt nga furnizuesit drejt marketeve dhe çmimeve të marketeve ndaj konsumatorëve, duke krahasuar të dhënat e majit 2025 me ato të majit 2026,” tha Mickoski.
Sipas tij, fokusi është vendosur ekskluzivisht tek produktet bazë ushqimore, jo tek produktet akcizore si duhani dhe pijet alkoolike.
“Qëllimi ynë është që produktet bazë ushqimore të jenë më të përballueshme për qytetarët,” shtoi kryeministri.
