Tiranë, 26 qershor, Zhurnal.mk – Komisioni për të Drejtat e Njeriut dhe Mjetet e Informimit Publik, zhvilloi sot mbledhjen ku shqyrtoi projektligjin “Për disa ndryshime dhe shtesa në ligjin ‘Për Shërbimin Informativ Kombëtar’, të ndryshuar”.
Nisma ligjore u prezantua nga ministrja e Shtetit për Marrëdhëniet me Parlamentin, Erjona Ismaili, e cila theksoi se ndryshimet synojnë përditësimin e kuadrit ligjor që rregullon veprimtarinë e Shërbimit Informativ të Shtetit, në përputhje me zhvillimet aktuale në fushën e sigurisë, teknologjisë dhe bashkëpunimit ndërkombëtar.
Relatori i çështjes, Ardit Bido, u shpreh se projektligji synon përmirësimin e kuadrit ligjor të funksionimit të shërbimit informativ, duke e përshtatur atë me strategjinë e sigurisë kombëtare dhe sfidat bashkëkohore që lidhen me kërcënimet hibride, kibernetike dhe ekonomike ndaj infrastrukturës kritike.
Pas diskutimeve dhe pyetjeve të anëtarëve të komisionit, projektligji u miratua në parim, nen për nen dhe në tërësi.
Në vijim, Komisioni shqyrtoi dhe miratoi edhe projektrezolutën për Autoritetin e Mediave Audiovizive, si dhe projektrezolutën për Avokatin e Popullit.
