Nënkryetari i Komisionit Europian, Margaritis Schinas, gjatë fjalës së tij në mbledhjen e Komisionit për Çështjet Evropiane dhe Komisionit për Administratën Publike, Rendin Publik dhe Drejtësinë, lidhur me politikat e Mënyrës Evropiane të Jetës dhe programin e Komisionit Evropian për vitin 2024, iu referua dhe çështjes së kryetarit të zgjedhur të bashkisë Himarë, Fredi Beleri.
Ai tha se jo vetëm që nuk e kanë harruar si çështje por tha se do të insistojnë që të ndiqet një proces i rregullt, pa të cilin spas tij nuk do të ketë një korridor të qartë europian për Shqipërinë në rrugën e saj drejt Europës.
“Në raportin e vitit 2023 theksuam se kjo çështje ngre shqetësime dhe probleme serioze. Gjithashtu, vumë në dukje kërkesat e njëpasnjëshme për akordimin e lejes, si dhe dyshimet se diçka nuk u bë në mënyrën e duhur gjatë mbledhjes së materialit hetimor. Dua të jem shumë i qartë. Jo thjesht që nuk e harrojmë këtë çështje, por do të insistojmë që të ndiqet një proces i rregullt pa të cilin nuk do të ketë një korridor të qartë europian për Shqipërinë në rrugën e saj drejt Europës”, deklaroi nënkryetari i Komisionit Europian.
Kujtojmë se Fredi Beleri u arrestua në ambientet e një lokali në Himarë 2 ditë para zgjedhjeve lokale të 14 majit. Vënia në pranga erdhi pasi akuzohet se në momentin e arrestimit Beleri në bashkëpunim me Pandeli Kokaveshi ishin duke blerë vota.
