Shkup, 7 mars – Në Ministrinë e Mbrojtjes, sot ministrja Sllavjanka Petrovska dhe kryetarja e Këshillit kombëtar për barazi gjinore, Savka Todorovska kanë nënshkruar Memorandum për bashkëpunim, i cili paraqet bazë për zhvillim të bashkëpunimit në sferën e barazisë gjinore dhe prespektivës gjinore.
Në takim, siç kumtoi MM, para nënshkrimit të Memorandumit, ministrja Petrovska theksoi se vizioni i Këshillit kombëtar për barazi gjinore për promovimin e të drejtave të grave si të drejta të njeriut dhe eliminimin e të gjitha formave të diskriminimit ndaj grave me qëllim për të ndërtuar një shoqëri me mundësi të barabarta, përputhet plotësisht me vlerat në mbrojtje dhe Armatë.
Kryetarja e Këshillit kombëtar për barazi gjinore, Todorovska u falënderua për gatishmërinë e ministres dhe Ministrisë së Mbrojtjes për zhvillim të inciativave të reja të përbashkëta në fushën e barazisë gjinore dhe porositi se kjo është rruga e duhur ndaj një shoqërie plotësisht të barabartë dhe pa diskriminim mbi çfarëdo baze.
Sipas MM, mbrojtja është bartës e Planit kombëtar të veprimit për zbatimin e Rezolutës 1325, “Gratë, paqja dhe siguria” që tregon se kjo çështje është në krye të prioriteteve të Ministrisë së Mbrojtjes. Ministria në nivel institucional është lider në zbatimin e politikave dhe praktikave për barazi gjinore, ndërsa perspektiva gjinore është e integruar në dokumentet strategjike të mbrojtjes dhe Armatës.
