Shkup, 19 shtator argument.mk/ – “Kështu aktualisht duket rruga që të shpie për te Spitali i sëmundjeve të mushkërive “Kozle”. Kanë filluar punimet për rikonstruimin e kësaj rruge për të cilën vazhdimisht ankoheshin prindërit që i çojnë pacientët e vegjël për trajtim këtu, si dhe taksitë dhe automjetet e tjera që kalonin dhe thoshin se po i shkatërrojnë makinat”.
Kryetari i Shkupit, Orce Gjorgjievski për TV21 tregon se në bashkëpunim me komunën e Karposhit po bëhet rikonstruksioni i plotë i rrugës, tha se po ndërtohet një mur i ri mbështetës dhe përfundimi i punimeve pritet deri në fund të vitit.
“E dini se ky është një aks rrugor shumë i frekuentuar, muri mbrojtës ishte në gjendje katastrofike por edhe rruga. Tani aktualisht po ndërtohet një mur mbështetës i ri dhe po punohet në rikonstruim me themel i rrugës. Mendoj se ishte e patjetërsueshme si një pjesë e projektit që po e realizojmë në Shkup, të vendosej prioritet edhe te ky aks që të mund te realizohet sa më parë dhe të përfundoj golgota e bashkëqytetarëve tanë. Absolutisht ka rrugë alternative, por besoj se deri në fund të vitit do të përfundoj rikonstuimi total i rrugës”, tha Orce Gjorgjievski.
Për qytetarët, gjendja e rrugës ka qenë e papranueshme, ndaj thonë se ndërhyrja ishte e nevojshme, ndërsa rezultatet do të vlerësohen pasi të përfundojnë punimet.
-Shpresoj të bëhet sa më shpejt.
-Katastrofë, është radha për ta bërë. Më në fund, e kur do ta kryejnë do të shohim.
Në Klinikën Universitare për Sëmundjet Respiratore tek Fëmijët “Kozle” në ditë kontrollohen rreth 100 fëmijë nga e tërë Maqedonia. Prindërit që i sjellin fëmijët për trajtim në këtë spital ankoheshin vazhdimisht. Spitali “Kozle” u ndërtua në vitin 2015, ndërsa rruga që të çon atje është rreth 500 metra, por në gjendje të keqe, si për makinat ashtu edhe për këmbësorët.
