Shkup, 24 nëntor – Mbi 50 për qind e popullsisë në vend është me obezitet, ndërsa viteve të fundit më së shumti kjo dukuri është përhapur tek fëmijët dhe adoleshentët. Shkaqet për këtë janë ushqimet e shpejta dhe mungesa e aktiviteteve fizike.
“Në momentin që ne i ushqejmë me dhunë fëmijët sidomos kur kemi përshtypjen se një fëmijë nuk ka peshë të mjaftueshme, kjo ndikon që të çrregullohet qendra e ngopjes në tru dhe pastaj me kalimin e kohës këto fëmijë nuk arrijnë që të kontrollojnë ndjenjën e ngopjes dhe në momentin që ne marrim ushqim pas ngopjes, ushqim pasi që kemi plotësuar nevojat atëherë arrin deri tek mbi pesha”, tha Valbona Kadriu, dietologe.
Dietologët thonë se përveç obeiztetit, ushqimet e shpejta rrezikojnë edhe shkaktimin e sëmundjeve tjera serioze.
“Neve e dimë se rreth objekteve të shkollave janë të instaluara fatkeqësisht këto objekte ose shitje të produkteve të gatshme, të produkteve të përpunuara, që nuk kanë asnjë vlerë ushqyese, nuk kanë benefite për organizmin e fëmijëve, përpos që kanë materie të dëmshme, që me kalimin e kohës po shkaktojnë edhe sëmundje të ndryshme përveç obezitetit edhe të hipertensionit, sëmundje të ndryshme kardiovaskulare, sëmundjet kancerogjene”, shtoi Valbona Kadriu, dietologe.
Qytetarët e anketuar nga Alsat thotë se janë të vetëdijshëm për pasojat, por jo çdo kush e ka luksin të ushqehet shëndetshëm.
“Mundohem, por megjithatë aq sa mundem. Është e vështirë. Të ardhurat e njerëzve janë në ato kufij”, tha një qytetar.
“Aq sa kemi para nuk mundemi të ushqehemi shëndetshëm me pension 13 mijë denarë”, theksoi një qytetare.
“Aq sa mundemi, aq sa na japin mundësit. Kam pension 13 mijë denarë dhe tani krahasoje për gjithë muajin, aq”, shtoi një qytetare.
“Unë ushqehem shëndetshëm, mish nuk ha, ha patate, kësi gjërash. Por, pijë duhan shumë, tani më 67 jam pensioner dhe që kur kam qenë fëmijë pijë duhan. E kam provuar po nuk mundem ta lë duhanin, edhe në mbrëmje të zgjohem bëjë kafe dhe pijë duhan”, tha një qytetar.
“Aq sa mundemi. Aq sa na lejon standardi, është minimale”, tha një qytetar.
“Ushqehemi shëndetshëm, por ajri nuk është i shëndetshëm, e kotë sa do që ushqehemi kur ajri nuk është i shëndetshëm”, shtoi një qytetar.
Rekomandohet që qytetarët të konsumojnë më tepër prodhime të cilat i përpunojnë vet nëpër shtëpi, dhe të shmangin ushqimet që gjatë kultivimit të tyre përdoren pesticide.
