OKB-ja shënoi sot 50 ditë që kur Izraeli vendosi një bllokadë të plotë ndaj ndihmave humanitare në Rripin e Gazës, duke paralajmëruar për një situatë të përkeqësuar me shpejtësi që po rrezikon jetën e civilëve, transmeton Anadolu.
“Sot bëhen 50 ditë që kur autoritetet izraelite kanë bllokuar plotësisht furnizimet hyrëse të çdo lloji në Rripin e Gazës”, tha zëdhënësi i OKB-së Stephane Dujarric në një konferencë shtypi.
Duke cituar Zyrën e OKB-së për Koordinimin e Çështjeve Humanitare (OCHA), Dujarric tha: “Që nga fillimi i marsit, asnjë kamion i vetëm me ushqime, karburant, ilaçe ose ndonjë gjë tjetër thelbësore nuk është lejuar të hyjë, pavarësisht se sa kritike janë për mbijetesën e njerëzve”.
Duke paralajmëruar për rezervat “rrezikshmërisht të ulëta” të ushqimit në enklavë, Dujarric tha: “Racionet janë shkurtuar. Medikamentet kritike, vaksinat dhe furnizimet mjekësore janë duke u mbaruar”.
“Ambulancave u është dashur të zvogëlojnë shërbimet për shpëtimin e jetës sepse pothuajse nuk ka karburant për t’i furnizuar këto ambulanca. Gazi i gatimit është zhdukur nga tregjet. Furra buke janë detyruar të mbyllen”, tha ai.
Ai paralajmëroi se “ndikimi i këtij bllokimi të vazhdueshëm të plotë të ndihmave humanitare është shkatërrues”.
“Fëmijët dhe të rriturit po ashtu janë të uritur. Aksesi në kujdesin shëndetësor po shkatërrohet”, duke shtuar se “sulmet ndaj civilëve, duke përfshirë ekipet e urgjencës dhe punonjësit e ndihmës janë rritur përsëri”.
Pas hetimit të brendshëm të Izraelit për një sulm ajror që vrau punonjësit e ndihmave në Rafah, Dujarric tha: “Bazuar në ato gjetje, është e qartë se shumë civilë, përfshirë punonjës të ndihmës, janë vrarë në Gaza”.
“Duhet të ketë përgjegjësi serioze për të gjithë ata që i kanë kryer ato”, theksoi ai, duke vënë në dukje se një hetim i OKB-së do të kërkonte një mandat specifik.
Lidhur me bisedimet e armëpushimit, Dujarric tha: “Gjithçka për të cilën mund të shpresojmë është që të arrihet një marrëveshje për të siguruar që ndihma humanitare të rrjedhë sërish lirshëm dhe pa pengesa në Gaza”.
Ushtria izraelite rifilloi sulmet e saj në Gaza më 18 mars, duke prishur marrëveshjen e armëpushimit dhe shkëmbimit të të burgosurve që filloi më 19 janar.
Në përgjithësi, ajo ka vrarë më shumë se 51.200 palestinezë në Gaza që nga tetori 2023.
Izraeli ndaloi dërgimin e ndihmave në enklavë më 2 mars, disa orë pas përfundimit të fazës së parë 42-ditore të marrëveshjes së armëpushimit.
