Shkup, 26 shtator argument.mk/ – Më pak se 24 orë pas publikimit të lajmit nga “Fokus” se nga një shkarkim kanalizimi nën objektin e Qeverisë në Shkup po derdhej një lëng në ngjyrë të verdhë në lumin Vardar, një ekip i Ndërmarrjes Publike “Ujësjellësi dhe Kanalizimi” doli në terren dhe u përpoq ta pastrojë atë.
Mbi shkarkimin ndodhet pikërisht objekti i Qeverisë, ndërsa në anën e kundërt ndodhet Ndërmarrja Publike “Ujësjellësi dhe Kanalizimi – Shkup”, e cila është përgjegjëse edhe për mirëmbajtjen e rrjetit të kanalizimit në kryeqytet. Lëngu i verdhë e ka turbulluar edhe më shumë ujin e Vardarit, i cili gjatë kësaj periudhe ka nivel mjaft të ulët për shkak të mungesës së reshjeve.
Pastrimi, megjithatë, është bërë vetëm në grilën metalike, e cila ishte mbushur me mbeturina. Punonjësit e “Ujësjellësit” e pastruan grilën, por lëngu i verdhë vazhdon të derdhet në lumin më të madh të vendit.
Sipas raportimit të “Fokus”, eprori i ka urdhëruar punonjësit që ta fotografojnë shkarkimin pasi është pastruar, në mënyrë që fotografia të publikohet menjëherë në rrjetet sociale. Por rrjetet sociale nuk do t’i pastrojnë fekalet nga Vardari.
Gjendja e Vardarit, simbolit kombëtar maqedonas të përjetësuar në këngë, në qendër të Shkupit është shqetësuese. Lumi është i ndotur dhe në shumë pjesë është shndërruar në një lloj kanali të madh kanalizimi, ku përfundojnë ujërat e zeza të qytetit, ujërat e ndotura industriale, si dhe mbeturinat e hedhura nga qytetarë të papërgjegjshëm.
Për fat të keq, Vardari është i pastër vetëm pranë burimit të tij, në Vërtok, mbi Gostivar. Në pikën e radhës ku kryhen matjet, pranë Forinës së Gostivarit, uji tashmë është shumë i ndotur dhe klasifikohet si ujë i kategorisë së katërt.
Ndërsa në Shkup, Veles, Negotinë dhe Gjevgjeli, lumi shpesh ndryshon ngjyrë dhe merr një nuancë të kaftë. Në këto kushte, ndotja e vazhdueshme e Vardarit nga ujërat e zeza dhe mbetjet është një problem që nuk mund të fshihet vetëm përmes pastrimit të një grile apo publikimit të fotografive në rrjetet sociale.
