Shkup, 19 shkurt – Ministri i Vetëqeverisjes Lokale, Zllatko Perinski së bashku me zëvendësin e tij Erxhan Selimi, sot, në kuadër të karvanit “Ku zemra është shtëpi” e vizutuan komunën Gjorçe Petrov ku zhvilluan takim me kryetarin Aleksandar Stojkoski dhe anëtarët e Këshillit komunal.
Siç theksoi Perinski, karvani “”Ku zemra është shtëpi” është i një rëndësie të jashtëzakonshme për Ministrinë e Vetëqeverisjes Lokale, sepse në kuadër të këtyre takimeve ka mundësi të bisedojë drejtpërdrejt me politikëbërësit lokalë, por, siç tha, edhe të dëgjojë nevojat reale të qytetarëve.
“Kjo komunë është jashtëzakonisht e rëndësishme dhe specifike për ne, sepse përveç pjesës urbane ka edhe një pjesë rurale dhe është vërtet e vështirë të arrihet një ekuilibër në kuadër të investimeve në mënyrë që ecuria e komunës të jetë në nivel të barabartë, dhe në këtë mënyrë të shfrytëzohet potenciali i plotë që ju ofron vetë komuna. Ky karvan, të cilin e quajtëm “Ku zemra është shtëpi”, është jashtëzakonisht i rëndësishëm, nga njëra anë kemi mundësinë të flasim drejtpërdrejt me politikëbërësit vlokal, dhe nga ana tjetër, të dëgjojmë nevojat dhe dëshirat reale të qytetarëve, të cilat janë jashtëzakonisht të rëndësishme për ne, dhe në këtë mënyrë mund të nxjerrim përfundime ose të propozojmë zgjidhje që do të tejkalojnë sfidat e të dyja palëve”, theksoi Perinski.
I pyetur nëse vizitat e tilla nëpër komuna nënkuptojnë fillimin e fushatës zgjedhore, Perinski tha se “puna kryesore e Ministrisë së Vetëqeverisjes Lokale janë vetëqeverisjet lokale, kjo është diçka që ne e bëjmë çdo ditë”.
“Puna kryesore e Ministrisë së Vetëqeverisjes Lokale janë vetëqeverisjet lokale, kjo është diçka që ne e bëjmë çdo ditë. Përveç politikës lokale, ne merremi edhe me zhvillimin rajonal. Prandaj në deklaratën time e përmenda se Komuna e Gjorçe Petrovit është jashtëzakonisht e rëndësishme sepse ka edhe një pjesë urbane edhe rurale. Është e vërtetë që dikush po e parashikon këtë si fillim të një fushate zgjedhore, por unë nuk pajtohem me atë konkluzion sepse obligim i ministrit është që të vizitojë vetëqeverisjet lokale dhe të mësojë për punën e tyre të përditshme për të përmirësuar gjendjen”, tha Perinski.
Kryetari i Komunës Stojkoski, nga ana tjetër, theksoi se në takimin e sotëm do të diskutohet edhe për ndryshimet e parapara në Ligjin për vetëqeverisje lokale, por, siç tha, edhe për tema nga përdetshmëria e banorëve të Komunës Gjorçe Petrov.
“Do të diskutojmë edhe për ndryshimet e parapara në Ligjin për Vetëqeverisje Lokale, në njërën pjesë, megjithatë do të hapim shumë tema nga aspekti i përditshmërisë së banorëve të Komunës së Gjorçe Petrovit. Jemi jashtëzakonisht të kënaqur me bashkëpunimin me Qeverinë dhe me projektet që i kemi marrë nga thirrja e parë, tani jemi duke u përgatitur për projektet nga thirrja e dytë. Së shpejti do të aplikojmë edhe në këtë pjesë”, theksoi Stojkoski.
