Tiranë, 01 korrik, Zhurnal.mk – Një grup qytetarësh, pjesë e protestës kundër investimit të planifikuar në zonën e Zvërnecit dorëzuan sot në Prokurorinë e Posaçme kundër Korrupsionit dhe Krimit të Organizuar, librin “The Albanian Files”.
Sipas tyre, libri është “përmbledhje e krimeve të kryera nga kryeministri Edi Rama”.
Aktivistja Sidorela Vatnikaj deklaroi para SPAK se libri “The Albanian Files”, përmban 523 projekte, të cilat sipas saj janë të ndërtuara, në proces ndërtimi ose të planifikuara për t’u realizuar.
Vatnikaj tha se dokumenti tregon shmangien e konsultimeve dhe shtoi se ndryshimi i Ligjit 21/24 për zonat e mbrojtura është miratuar në lidhje me projekte që ishin parashikuar më herët.
“Në këtë libër gjenden 523 projekte, disa të ndërtuara, disa në ndërtim e sipër dhe disa të tjera në plan për t’u ndërtuar. Në këtë libër del qartë se kryeministri Edi Rama ka shmangur konsultimin. Në këtë libër del qartë se ligji 21/24 është një ligj i miratuar për shkak të projekteve të ndryshme që gjenden në këtë libër vite më parë se të ndryshohej ligji”, u shpreh Vatnikaj për gazetarët.
“Ne jemi këtu për t’i dhënë SPAK se ka mbështetjen tonë për veprimet e deritanishme. Ne nuk jemi për drejtësi popullore, por ne kërkojmë një shtet të së drejtës ku kryeministri të trajtohet dhe hetohet si të gjithë qytetarët”, tha ajo.
