Tetovë, 13 nëntor – Në këtë rrugë të fshatit Pirok të Bogovinës, para 11 vitesh mbeti o vrarë Muhamet Asani, i njohur në Tetovë me nofkën Meka. Në atë kohë rasti mbeti i pa zbardhur, por dje u ndalua një i dyshuar. Sipas njoftimit të SPB Tetovë i dyshuari është SH.SH. 41 vjeç nga Poroj i Tetovës.
“Dje rreth orës 16:30, është arrestuar personi SH.SH., 41 vjeç nga fshati Poroj, i cili dyshohet se ka kryer vrasjen e datë 12.10.2013, në rrugën rajonale Pirok-Zherovjan. Pas urdhrit të Gjykatës Themelore të Tetovës, është kryer bastisje në shtëpinë e Sh.Sh.. Ndaj personit është parashtruar kallëzim penal, ndërsa Gjykata Themelore e Tetovës i ka caktuar masën e paraburgimit prej 30 ditësh”, thotë SPB Tetovë.
Sipas avokatit Qenan Ramani i cili përfaqëson familjarët e viktimës, në këtë vepër penale janë përfshirë më shumë persona. Ai thotë se i ndjeri është nxjerr në pritë nga një i njohur, ndërsa vrasja ka qenë e mirë e menduar.
“Në këtë vepër penale, sipas rrethanave, ka indikacione se janë të përfshirë më shumë se tre persona dhe hy në grupin e vrasjeve të njohura në të drejtën penale, vrasje tinzare, gjegjësisht, personi, faktikisht tash i ndjeri Muhamedi, është thirrur apo është besuar nga një person tjetër dhe në këso raste janë vrasje, kualifikohen si vrasje tinzare dhe vrasje mirë të paramenduara, ku dyshojmë se mund të ketë të përfshirë edhe persona të tjerë, të cilët kanë marrë, apo kanë qenë të punësuar në organet shtetërore”, tha Qenan Ramani- avokat – përfaqësues i familjes Asani.
I pyetur nëse personat e dyshuar për vrasje kanë pasur lidhje me të ndjerin Meka, Ramani u përgjigj:
“Tash i ndjeri ka pasur raporte të ndryshme me njërin nga të dyshuarit e përfshirë në këtë vrasje. Sipas familjarëve mosmarrëveshje kanë pasur, por kanë qenë punë banale. Nuk kanë pas ndonjë proces që u dashtë të behët, kjo që është vepër e rëndë. Nuk kemi dyshim se kjo vepër penale do dale para drejtësisë, të gjithë të përfshirët në këtë vepër penale dhe të gjithë do të dënohen dhe do të marrin dënimin e merituar”, deklaroi Qenan Ramani.
Deri më tani, për këtë rast është i dyshuar vetëm një person. Se a do të ketë zgjerim të hetimit, pritet të shihet gjatë ditëve në vazhdim. Jo zyrtarisht mësohet se i dyshuari e ka pranuar veprën penale.
