Shkup, 9 maj Zhurnal.mk – Zëvendësministri i Ekonomisë, Marjan Risteski, deklaroi se Maqedonia ka arritur nivelin më të ulët historik të papunësisë, me më pak se 90 mijë persona të regjistruar si të papunë dhe me numrin më të lartë të popullsisë së punësuar.
Sipas tij, gjatë vitit të kaluar janë hapur rreth 15 mijë vende të reja pune, falë politikave qeveritare, investimeve të huaja në zonat industriale teknologjike zhvillimore (TIRZ), si dhe riinvestimeve të kompanive vendore.
“Po rritet vëllimi i punës dhe cilësia e vendeve të reja të punës. Kjo vjen edhe si rezultat i masave aktive që ndërmarrin Ministria e Ekonomisë dhe Punës, si dhe institucionet e tjera shtetërore, për t’i ndihmuar qytetarët, veçanërisht të rinjtë deri në 29 vjeç, të gjejnë më shpejt punë”, tha Risteski.
Ai theksoi se për herë të parë numri i të papunëve të regjistruar ka rënë nën 90 mijë, ndërsa numri i të punësuarve ka kaluar mbi 710 mijë persona nga popullsia e aftë për punë.
Risteski shtoi se edhe kjo shifër e papunësisë nuk paraqet gjendjen reale, pasi rreth 30 mijë persona që merren me bujqësi figurojnë si të papunë në Agjencinë për Punësim. Gjithashtu, në kategorinë e popullsisë së aftë për punë përfshihen edhe nxënësit e shkollave të mesme nga 16 deri në 18 vjeç.
“Realisht, numri i të papunëve në Maqedoni do të ishte rreth 40 deri në 45 mijë persona, ose afërsisht 5 për qind e popullsisë së aftë për punë, që është përqindja më e ulët historike e papunësisë në vend”, deklaroi ai.
