Veles, 9 maj Zhurnal.mk – Ministria e Punëve të Brendshme ka bërë të ditur se është ndaluar një autobus që transportonte nxënës nga një ekskursion në autostradën Veles-Shkup, pasi një prind kishte denoncuar në polici se automjeti ishte prishur disa herë gjatë udhëtimit.
Sipas policisë, më 8 maj 2026, rreth orës 22:50, në pikën pagesore “Otovica” në autostradën Veles-Shkup, zyrtarët policorë të SPB Veles kanë ndaluar autobusin e tipit “Setra” me targa të Shkupit, i drejtuar nga A. Gj. (43) nga Shkupi.
“Pas një denoncimi paraprak nga një qytetar, fëmija i mitur i të cilit ndodhej në autobus gjatë kthimit nga ekskursioni, se autobusi kishte mbetur disa herë në defekt gjatë rrugës, automjeti është ndaluar dhe dërguar për kontroll teknik të jashtëzakonshëm për të konstatuar gjendjen teknike”, thuhet në njoftimin e MPB-së.
Autobusi është sekuestruar dhe dërguar në stacion për kontroll teknik, ndërsa nxënësit dhe pasagjerët e tjerë janë transportuar në mënyrë të sigurt drejt destinacionit përfundimtar me një autobus tjetër.
Nga policia bëjnë të ditur se pas përfundimit të hetimeve dhe kontrollit teknik të jashtëzakonshëm do të ndërmerren masat përkatëse ligjore.
