Shkup, 23 qershor – Aktualisht Ministria e Ekonomisë dhe Punës dhe të gjitha ministritë dhe institucionet e tjera shtetërore po punojnë në ndryshimin e normave ekzistuese në formën e ligjeve dhe rregulloreve të punës që do të vendosin standarde më të rrepta dhe më të larta për mbrojtje dhe siguri për të gjitha subjektet fizike dhe juridike që duan të punojnë me veprimtarinë hotelierike. Do të rritet koordinimi midis institucioneve dhe do të përforcohen kontrollet dhe mekanizmat shtetërorë, theksoi zëvendësministri i Ekonomisë dhe Punës, Marjan Risteski sot në konferencën me temë “Mbrojtja e objekteve nga zjarri dhe prezantimi i punës së komitetit teknik ISRMV KT 46”, që mbahet në Odën Ekonomike.
Qëllimi i kësaj ngjarje, siç tha, përveç njohjes me aktivitetet dhe punës e komitetit teknik pranë Institutit për standardizimin e Maqedonisë, është rritja e ndërgjegjësimit tek opinioni profesionist dhe më i gjerë për rëndësinë e zbatimit të standardeve dhe rolin e tyre në aktet ligjore dhe nënligjore që lidhen me mbrojtjen nga zjarri, si një segment thelbësor në procesin e projektimit dhe ndërtimit.
Sipas tij, kjo temë është me rëndësi të jashtëzakonshme dhe për fat të keq është një temë e dhimbshme dhe aktuale në Maqedoni. “Në vitet e fundit, kemi qenë dëshmitarë të tragjedive të mëdha që shkaktohen pikërisht nga mungesa e zbatimit të standardeve të sigurisë dhe mbrojtjes nga zjarret. Këto tragjedi ishin rezultat i normave ligjore të mbushura me pasaktësi, mungesës së mekanizmave të kontrollit për zbatimin e rregulloreve ekzistuese të përcaktuara dhe standardeve të sigurisë, koordinimit të dobët të institucioneve, por edhe pragut të ulët të standardeve për dhënien e lejeve për punë në veprimtari ose objekte”, tha Risteski.
Konferenca është organizuar nga instituti për standardizim dhe Komiteti teknik ISRMV KT 46, në bashkëorganizim me Odën e Arkitektëve dhe Inxhinierëve të Autorizuar, Odën ekonomike të Maqedonisë së Veriut, Tehnoinspekt, Knauf, Ading dhe partnerë të tjerë.
Konferenca filloi me një minutë heshtje në nder të të vdekurve në zjarrin në klubin “Puls” në Koçan.
