Numri i të vdekurve nga cikloni Fengal në Sri Lankë dhe Indi është rritur në 20, transmeton Anadolu.
Në Sri Lankë, stuhia, e cila përshkoi vendin ishullor të Azisë Jugore të premten, shkaktoi shkatërrim të gjerë, duke rezultuar në 17 viktima për shkak të përmbytjeve dhe rrëshqitjeve të dheut, tha agjencia e menaxhimit të fatkeqësive e vendit.
Fengal solli shira të dendur dhe kushte të rënda moti, duke zhvendosur rreth 470.000 njerëz, të cilët tani po kërkojnë strehim në kampet e përkohshme të ndihmës.
Në Indi, të paktën tre persona kanë humbur jetën pasi cikloni goditi përgjatë brigjeve jugore të rajoneve Tamil Nadu dhe Puducherry herët në mëngjesin e së dielës, duke sjellë shira të rrëmbyeshëm dhe erëra të forta, të cilat çuan në një pezullim të shkurtër të fluturimeve.
Stuhia, e dyta që u formua mbi Gjirin e Bengalit këtë sezon, shkaktoi erëra të fuqishme që arritën deri në 90 kilometra në orë ndërsa kaloi vijën bregdetare.
Ciklonet, të cilat janë të krahasueshme me uraganet në Atlantikun e Veriut ose me tajfunet në Paqësorin veriperëndimor, janë një dukuri e rregullt në veri të Oqeanit Indian, por intensiteti i tyre është rritur për shkak të ndryshimeve klimatike.
