Shkup, 7 tetor, argument.mk/ – Po rikthehet ajri i ndotur në Shkup. Mbrëmë, kryeqyteti ishte ndër qytetet më të ndotura në botë. Të dhënat më të fundit tregojnë se sot indeksi i cilësisë së ajrit ka arritur në 80, duke e renditur kryeqytetin në zonën e ndotjes së lartë.
Ambientalistët thonë se masat dhe rekomandimet për uljen e ndotjes përsëriten prej vitesh, por zbatimi i tyre mbetet i pamjaftueshëm.
“Për hir të vërtetës, prej vitesh përsërisim të njëjtat rekomandime: duhet të bëhet kujdes me djegien e materialeve të papërshtatshme për ngrohje, sidomos në industri, pasi ato ndikojnë në rritjen e ndotjes. Njëkohësisht, duhet të subvencionohet përdorimi i energjisë elektrike për ngrohje, si alternativë ndaj qymyrit mazutit dhe lëndëve të tjera ndotëse”, deklaroi Arianit Xhaferi, Ambientalist për Alsat.
Xhaferi thotë se përveç kontrollit të djegies së materialeve të papërshtatshme, nevojiten alternativa më të pastra për ngrohje dhe forcim i transportit publik.
Zbatimi i vazhdueshëm i këtyre masave është thelbësor për përmirësimin e cilësive së ajrit dhe mbrojtjen e shëndetit të qytetarëve.
Nga Ministria e Ambientit Jetësor thonë se posedojnë plan strategjik afatshkurtër që i referohet sezonit të ngrohjes gjatë dimrit. Në atë plan përfshihen masat që duhet t’i ndërmarrin institucionet qendrore dhe lokale mbi ruajtjen e ambientit dhe parandalimin e ndotjes së ajrit nga komponentët ndotës.
