Shkup, 27 dhjetor – Në vazhdën e realizimit të projektit “Mos besoni ë dezinformata, ne jemi NATO”, Agjenia e Lajmeve Zhurnal ka zhvilluar intervistë me kryetarin e Aleancës për Shqiptarët, Arben Taravari. Në këtë intervistë Taravari thekson rëndësinë e paçmueshme që ka për vendin tonë anëtarësimi në NATO, duke krijuar stabilitetin më së të nevojshëm në këtë pjesë fragjile të Evropës. Megjithatë kryetari i ASH-së shprehet edhe mjaft kritik, duke vlerësuar se për shkak të korrupsionit të lartë vendi nuk ka arritur të përfitojë maksimalisht nga anëtarësimi në NATO.
“Shteti ynë është në zhvillim e sipër, dhe me këtë dua të them se kemi ende shumë punë për t’u pjekur, për t’u bërë një shtet me qëndrueshmëri sociale. Në fjalë të tjera kjo përkthehet se ka ende shumë korrupsion i cili kërkon kohën e tij për t’u zhdukur. Një nga pasojat më të errëta të korupsionit është bllokimi i hallkave që forcojnë shtyllat e shtetit, kështu edhe në rastin e anëtarsimit në NATO ishte niveli amatoreks dhe koruptiv i një sistemi që le për të dëshiruar e që bëri vendim të mos përfitonte maksimalisht nga aderimi në këtë traktat të rëndësishëm botëror”, thekson Taravari.
ASH është pjesë e shumicës qeveritare, kurse kryetari i saj taravari në intevistën për Zhurnal premton se nëse mbetet kështu edhe pas zgjedhjeve, nga dita e parë do të punojë për avancim të mëtejmë të bashkëpunimit me NATO-n.
“Maqedonia është një vend me stabilitet tepër të brishtë politik. Në këtë kontekst providenca është thuajse e pamundur por sidoqoftë një gjë e di dhe ajo është fakti se ne do të punonim prej ditës së parë dhe çdo ditë tjetër me të njëjtin intesitet për të bërë më të mirën për njerëzit”, shprehet Taravari për të shtuar:
“Partia e ASH-së është e njohur për qëndrimin e saj pro-amerikan dhe pro-evropian. Personalisht kam ndërtuar një sistem konsultimi me disa ambasada ku kryeson ajo amerikane dhe të ndajë me ta mendime është një përvojë e madhe dhe frytdhënëse”.
“Besoj se kontributi ynë ka ndodhur krejt natyrshëm por ka qënë po ashtu i madh dhe i rëndësishëm sepse ka shprehur me fanatizëm atë që është konkluduar nga bisedat me shtetet e tjerë miq”, vlerëson Taravari.
Apeli i tij është që Bashkimi Evropian të rrumbullakësojë atë që e ka filluar NATO dhe të pranojë në anëtarësi vendet e rajonit.
“Ky është një moment i veçantë për botën dhe Ballkanin.
Ajo që po ndodh në Ukrainë është një sinjal i qartë se duhet kujdes tashmë pēr çdo lëvizje, pavarsisht që mendoj se Evropës i ka ardhur koha të ndryshojë të gjithëve strategjitë e saj dhe të pranojë Ballkanin pranë zyrave të saj ekonomike”, nënvizon kryetari i ASH-së në intervistën për Zhurnal./Zhurnal
